【張晨】《唔通大聲夠惡夠無賴 ，就等於有道理？》

內容由博客提供及授權轉載，不代表本刊立場

前幾日，遇上一件小插曲。

話說當日嘅下午4、5點，交通好擠塞，成條馬路郁都唔郁。
咁有架Van仔喺小路等咗好耐，
都未有機會出大路。（因為小路讓大路，有咩意外小路出嗰個會食晒。）

但突然間，有個女人衝去架Van仔度，敲佢隻窗。
個司機都未開晒隻窗，已經畀個女人喪鬧。

（高8度）「你識唔識揸車㗎？！吓！
停喺度做咩呀？啱啱有機會又唔出大路！唔識揸咪x學人揸啦！
做男人做到你咁冇x用㗎！」

原來呢個女人係後面架爛鬼私家車嘅主人，專登落車鬧人。

司機大佬畀佢一句「撻着」，用咆哮聲線：「x你老母！你講咩x嘢呀！點x樣出呀！吓？」

女人都回得好快：「你咁大聲做咩呀！恐嚇呀？」

司機大佬心直口快：「咁報警囉！嘈！嘈咩x啫你？」

女人：「好呀！你咪走呀！我呢家就去報警！」
女人一路講，一路退後。

好，作為望到個路面情況嘅小弟嚟講，
當時van仔得半個車位，佢的確可以夾硬過，但撞車機會都大。
畀我都唔會博，好合理。

諗住件事落幕，點知仲有下半場。

個女人等等下，又落車上前挑機：
「你啱啱咁大聲做咩呀！你有冇禮貌呀！」

司機大佬已經好火：「你又噏咩x呀，x你！又話報警？報啦！」

女人亦都開始九唔搭八：
「做咩呀？咁惡想打人呀？嚟呀！我企喺度畀你打！夠膽你就打！」

認真，我唔會再叫佢做女人，我會叫佢8婆。

呢個時候，司機大佬已經有空位可以出大路，於是冇理個8婆，駛出大路。

而結局篇馬上上演。

因為大路再轉個彎，就係一間酒店。
Van仔司機似乎係酒店職員，而嗰位8婆就尾隨佢入咗酒店嘅泊車位。

大家都知，司機返到主場，
唔代表有主場之利，反而係8婆佔有絕對優勢。

因為8婆懂得擅用「客人」嘅優勢，即使佢根本唔係！

果然，個8婆追殺咁落車，追住司機大佬喪鬧：
「哦！你係度打工呀！啱啦！我就喺度住！叫你經理出嚟呀！」

「叫你經理出嚟呀」呢一句，你唔係8婆，邊講得出？

畀人恰到上自己地頭，司機大佬都抱住玉石俱焚咁心態，諗住同佢死過，但啲同事當然拉住佢！

事情鬧大，好多西裝友都已經到場，想安撫呢位8婆。

8婆知自己拎住「客人」呢個免死金牌，開始趾高氣揚：
「你啲員工呀！又冇禮貌！頭先仲恐嚇我，話要打我添呀！我就一定要投訴佢。」

哇，連我呢個旁觀者，都聽到拳頭都硬埋。

係你撩人在先；
係你大聲在先；
係你無拿拿叫人打你在先，司機大佬仲要冇講過一句「我打你。」

成件事，真係明屈。
大聲就可以屈人？無賴就大晒？

我真係火火地，連帶幾個一齊本來旁觀嘅街客都睇唔過眼：
「咪屈人喎，個司機邊有話打你。」

但班員工聽到，都只係好無奈咁點下頭。
大家都明個事實係點，但香港就係咁，
只要佢夠膽喺你公司大吵大鬧，你就要買佢怕。

因為件事再搞大啲，所謂高層，唔會怪個客，怪都係怪啲員工，
怪佢哋點解唔息事寧人。

而呢個瘋狂社會，
亦的確有好多衰人濫用「客人」身份，因為自己嘅喜惡亂咁投訴。

一班西裝人，只能低聲下氣，忍氣吞聲，畀條8婆鬧，畀佢消氣。
司機大佬畀員工慢慢拉走，睇住佢嘅眼神，嗰種憤怒。
我真係好想打個8婆一身，只係理智話我知，「邊個郁手，邊個蝕底。」

所謂文明社會，不文明事依然每日發生。
我哋可以做嘅，就係應承自己，做咩都要顧及他人感受。
要明白我、你同司機大佬都係人一個。

千祈唔好學條8婆，千祈唔好做呢種不知所謂嘅人。

內容延讀：
【張晨】《其實我們不想自己居住的地方，成為景點般的存在》
>>> LIKE我們fb <<<
fb.com/newmonday.com.hk