【張晨】《其實我們不想自己居住的地方，成為景點般的存在》

內容由博客提供及授權轉載，不代表本刊立場

記得有次因為開會，路經一個大型屋苑，
我見佢哋貼滿一啲標語，類似係講人多車多，個流量已經大到
「自己住喺度，反而咩都做唔到」。

望咗一眼，就諗起一個朋友曾經都訴苦，話佢住嗰頭，一去到星期六日，因為個大型商場近年不斷發展，搞到遊客區咁，成個地段逼到旺角咁。

要同屋企人落去食個Lunch，都等位等到地老天荒，
所以佢哋好反傳統咁，一到假日就唔會出街。

將心比己，我慶幸自己樓下個商場接近「百無」，又較為「荒山野嶺」，
所以咩日子，都唔會擠迫嘈雜。

喺呢個充滿商業嘅社會，好多地方都各有奇謀，
希望手上嘅店舖可以加多啲租，
咁要加租、就要生意好、要有生意就要有人流，

於是，大大小小不同計劃應運而生，整旺個場、擠爆個地方。
佢可能覺得大家都開心，
遊人有地方去開心、租戶有客人開心、佢賺多啲租更開心。

但一班住喺度嘅人，可能並唔開心。
人有時真係好簡單，唔係要世外桃園，
只係希望閒暇時間，落樓下可以慢慢哋、靜靜哋…….
舒服咁抖啖氣。

可惜，咁嘅要求已經係奢侈。

就好似一個國家，遊客可以帶嚟經濟收入，
但過量就會破壞生活質素。

呢個道理縮返細，應用喺唔同社區都一樣。

只要人過量，就未必係好事。

可惜，商人就算明，都唔會理；
而住客想反抗，作用亦始終唔大。

一句「地少人多，我都冇計㗎」就可以輕輕帶過。
然後再同你講「呢個時勢，有個地方住已經好好啦，出少句聲乖乖哋啦～」

我們，就是這樣無可奈何地活了過去。

內容延讀：
【張晨】《當他的短訊只剩下Emoji，你還拼命甚麼？》
>>> LIKE我們fb <<<
fb.com/newmonday.com.hk