【是否很驚訝，講不出說話】Sanrio人物大賞有古怪？Hello Kitty僅排第10！

當然事出必有因，但當中嘅文化實在好難三言兩語表達。今次就嘗試用最容易入口嘅方法，解釋俾你聽個排名點解會咁古怪，順便呼籲埋各位Hello Kitty、Melody嘅粉絲，記得幫手投票，唔好俾佢哋跌出10大咁慘慘豬，呢個選舉分分鐘會影響到日後Sanrio嘅商品發展呢！

text – Nam

吹行雞click呢度投Hello Kitty啦！

內容延讀：

＞唔使選！5個男女都愛的日韓氣質女生 文青最愛

＞一姐發威！Hello Kitty x b+ab經典紅蘋果新作

《SHOW BY ROCK!!》未算主流
呢個4組團體角色全部來自日本新番動畫《SHOW BY ROCK!!》，佢係由同名日本手機遊戲改名而成嘅動畫，而《SHOW BY ROCK!!》呢隻App其實係一款音樂類型遊戲，當轉成動畫化後，好自然地動畫主題亦係「以主角變成明星偶像」為主線。就咁諗，同坊間唔少播緊嘅動畫都好相似，當中數一數二嘅例子，自然係近幾年橫掃ACG界（Anime、Comic、Games）嘅《LoveLive!》，由現實招募真人成為虛擬偶像，令動畫入面嘅少女團體偶像難以介定到底係「真」定「假」，係非常成功嘅代表作。食正熱潮，照估真係日本大熱都似乎好正常？答案係，就算《SHOW BY ROCK!!》正人氣急升係事實，但都只限於秋葉原一帶，連日本都未去到好瘋狂，最少同今年彈得勁起嘅梳乎蛋（蛋黃哥）仍未有得比！

ShinganCrimsonZ唔係贏人氣
咁到底點解ShinganCrimsonZ會排到第1呢？話說呢套動畫入面最少10組概念樂團，其實每組嘅個性都非常痴線，而且有大量刻意露肉嘅鏡頭，只有終極神級、只愛動畫唔愛真人嘅毒男先會接受得到。排名第1嘅ShinganCrimsonZ並非主角團體，4個男仔喺性格設定上，全部都係無藥可救嘅「中二病」病人－－源自日本網路，用以揶揄人有太多幻想、只活喺自己世界－－例如覺得自己全世界最靚仔、只要分開腳企就會發揮到宇宙級結他solo等，甚至佢哋首招牌主題歌嘅歌詞「我們用深紅色的心眼看著這個混濁的世界…」感覺極度難頂，實際上呢類設定係俾一類名為「乙女」嘅ACG愛好者睇，毒男見到只會恥笑，於是順利成章，亦成為最適合「惡搞」嘅素材。

網絡文化勁複雜　實情網民搞亂檔？
《SHOW BY ROCK!!》風格明顯同Sanrio一貫作風唔同，喜愛Sanrio角色嘅多數係Kawaii少女，本來就同毒男完全係兩個世界，但偏偏人物大賞就將兩個世界嘅人拉埋咗一齊，變成毒男同Kawaii妹豬之爭，於是先會搞到個票選咁奇怪。毒男們除咗將自己心愛（但唔大熱）嘅作品推到高位外，更明顯刻意搞亂其他角色嘅選票，以往必定係排1、2嘅Hello Kitty變成第10，當然唔係因為佢人氣下降，而係有心人刻意大量投票俾二三線角色將佢哋推上去，再「食住花生等睇戲」嘅結果，要知道Sanrio會以此排名決定周邊產品嘅戰略，點解Hello Kitty幾乎乜都出到，就係因為呢個原因，好事之徒自然會想睇吓Sanrio會唔會出一堆ShinganCrimsonZ周邊（然後滯銷）啦！雖然冇證冇據，純粹經驗之談，係真心定玩嘢大家分析，亦估計最終結果都唔會係ShinganCrimsonZ跑出，但未投票嘅你，都記得幫手撐返Kitty姐上去呀！

內容延讀：

＞唔使選！5個男女都愛的日韓氣質女生 文青最愛

＞一姐發威！Hello Kitty x b+ab經典紅蘋果新作