朝朝瞓醒多條仔！
廣告
【Trend’s Like Wind by杜如風】最近小女在各大小報張雜誌上出現了很多被炒作的緋聞，真是日日新鮮日日甘 (好像呢排我啲感情生活重精采過我嘅人生咁)！遠的有馮德倫、「早已被認定為一對」的老死又南、到「唔係太熟」的郭子健導演，再到我的十幾年好兄弟阿樂…… 真係邊個埋嚟邊個死！就算他們沒有埋我身，記者們只單靠我《Instagram》內的照片，便可以編出一個二個故事出來，小女不能不佩服這班想像力超豐富，而且非常天馬行空的寫手！電影、電視都需要原創，小女真心想推薦他/她們去做電影編劇，應該有相當不錯的發展！
近日每天都有不少記者朋友打來，要我回應這個、回應那個，回到我頭都暈暈哋！ 試過1天之內，同一間報館共4名記者打電話來，叫我回應跟郭子健的戀情，當時我正在為別的報刊做專訪，經理人也在身邊，她示意我回應其中1位記者就可以了，簡短幾句：「喂，呢個我真係唔太熟，就係同佢做過幾次訪問咋！喂呀，傳都傳個熟啲架啦，打擾到人哋就唔係幾好啦！一係傳番又南啦！反正都傳咗咁多年，我哋都慣晒，而且我哋兩個又咁熟，大家易話為好多！」(我也不怕開門見山地跟記者說)！
哈！怎料翌日，我還在睡夢中，又有記者打來要我回應另一段緋聞：「1日咋喎！ 又1件？今日又輪到邊個呀？」「余文樂。」「哈哈！梗係搵到我同佢去京都啲相啦！好無聊！」「咁你都回應2句啦！」「我而家要起身放狗同餵狗，搞掂打俾你！」然後我便首先服侍了家中2位大爺，接着打俾阿樂：「Sorry呀bro！今日輪到你！連累你真係唔好意思！」「我真係冇所謂，真朋友唔會因為呢啲事而影響到！你都要頂住，唔好俾呢啲新聞影響到你！」(一段很窩心的雪中送炭)！
有冇咁爽呀？乜都冇做過，朝朝瞓醒多條仔？有冇咁過癮呀？小女認為這些傳聞簡直贏盡童話故事裏的各位公主們！因為那些公主在某程度上要付出一些，才能找到她們的王子……而小女，甚麼也沒做過，便1日1新仔！唉！都唔知好嬲定好笑！還是一笑置之為上上策！！！
text-杜如風
