【Travel佳】$2,000情侶2日1夜　聖誕輕旅行企劃

聖誕節就快到，想同honey玩轉2日1夜輕旅行，重想有濃厚歐陸氣息？唔係下下要坐飛機嘅，其實就算留響香港，一樣可以有外國度假feel，人均大約$2,000，化算過去澳門，Travel佳今次就有好介紹。

text – Travel佳 photo – Travel佳

Checkpoint 1 自選水療

第一日瞓到黃朝白晏先起身，出發去到中環坐船入愉景灣，經過25分鐘嘅船程到達D’Deck，由碼頭搭免費穿梭巴士到充滿歐陸風，重有個鐘樓嘅愉景北商場，適逢午餐時間，可以先到餐廳「醫肚」。

呢度可以揀食印度菜、巴西燒烤、土耳其菜、簡約西餐等，唔使擔心冇嘢食！

食完之後行去隔籬嘅香港愉景灣酒店辦理入住手續，如果有budget嘅話，可以去Spa Botanica享受招牌嘅意大利有機蠟燭Signature treatment，舒緩日常響生活積聚嘅壓力添！

Checkpoint 2 大擦聖誕海鮮buffet

聖誕節梗係要食聖誕大餐！香港愉景灣酒店提供兩款節日限定晚餐。

喜歡食自助晚餐嘅可以去Café bord de Mer & Lounge，嗰度有齊唔同海鮮俾seafood lovers任擦；至於鍾意多啲情調，去The Bounty Entertainment & Sports Bar歎晚餐可以一邊食一邊談下心。

香港愉景灣酒店

地址：愉景灣海澄湖畔路88號

電話：2295 8288

網址：www.aubergediscoverybay.com

Checkpoint 3 馬車同遊愉景北

響咁靚嘅酒店住左晚，個覺都瞓得甜啲。第二朝起身，當然要落去酒店嘅餐廳食番個buffet breakfast，退房前可以租用單車喺充滿南歐風情嘅社區遊憩一番，感受寫意生活嘅氣息。

當然，喺愉景北重有唔少朝聖地點，拍拖一定唔可以錯過。你可以去海傍嘅心鎖長廊，扣上愛情鎖記錄你同honey嘅永恆時刻。你重可以坐著馬車欣賞周圍動人風光，回憶下倆小口子嘅幸福甜蜜片段。嘩！啲度假feel重唔出晒黎？

聖誕古典馬車暢遊

日期：12月24至26日(平日版觀光馬車暢遊則每日開放)

開放時間：10:00a.m. – 12:00n.n.，2:00p.m. – 6:00p.m.

地點：香港愉景灣酒店活動中心

Checkpoint 4 　D’Deck 星光長廊

聖誕節又點少得睇燈飾？遊覽完愉景北，可以搭免費穿梭巴士返D’Deck。嗰邊嘅聖誕燈飾照亮整個夜空，有光之隧道、星光長廊，感覺實在超夢幻呀！最緊要重係免費任影，俾你同honey勁selfie都得啦！

Checkpoint 5 投入歐陸聖誕巡遊

今個聖誕節，愉景灣最高潮嘅節目當然係免費嘅「聖誕閃爍嘉年華」巡遊，一眾公主、王子、歐洲貴族、士兵同小丑將會圍繞D’Deck臨海美食區同愉景廣場載歌載舞。

巡遊隊伍到達華麗舞台後，重會上映一幕精彩的表演，表演者會同現場觀眾互動，甚至邀請大家上台一齊跳舞，呢種氣氛平時要去歐洲先感受到，今年終於喺香港都玩到，今個聖誕夠晒歡欣啦！

D’Deck聖誕巡遊

日期：12月24至26日（星期四至星期六）

巡遊時間：6:30pm 及 8:30pm（巡遊表演隊伍於3:30pm起同大家見面影相留念）

地點：D’Deck臨海美食區及愉景灣碼頭

Checkpoint 6 D’Deck食燭光晚餐

講到浪漫又點可以唔擦番餐燭光晚餐？D’Deck嘅餐廳預備左聖誕菜單，例如主打德國美食嘅Berliner，聖誕特別套餐嘅主菜有慢煮法國鴨髀配紅椰菜、蘋果啤梨醬同麵包粉糰，夠晒應節，食飯期間重可以欣賞到迪士尼嘅煙花，係咪夠晒romantic先？食到飽換埋免費船飛出番中環，假期真係夠晒perfect喇！

Berliner

地點：愉景灣D’Deck地下G01B

電話：2987 8203

Budget：

佳節住宿優惠:連自助早餐及自助晚餐$2,788起 + 去程船票 $80 + 午餐 $180+ 聖誕大餐約 $650 + 馬車 $300 = $3,998 / 二人

查詢：

香港愉景灣

網頁：www.ddeck.hk／www.dbnplaza.hk