text-Phoebe photo-Jacy wardrobe-A Bathing Ape （I.T）

點解咁好聽嘅
首次喺香港舉行演唱會，EPIK HIGH唱近19首歌，以由新碟《SHOEBOX》嘅歌曲，到不能缺少嘅經曲歌〈Map The Soul〉，以及筆者最恨聽到嘅〈EYES NOSE LIPS〉均一一唱盡，雖然舞台冇特別機關，燈光亦唔算勁靚，歌衫都只不過係換咗2套咁大把，但單係佢哋嘅live performance已經可以蓋過一切，粉絲受落，唱〈Love Love Love〉時，識得跟住做L手勢，唱〈Burj Khalifa〉時，甚至有男觀眾跟住一齊rap，去到尾聲時，Tablo突然拎罐啤酒同Mithra Jin共飲，之後再扮嘔，非常搞笑。之後，3位成員將手上嘅水當聖水一樣，一支又一支灑向台下粉絲，再整番首〈Don’t Hate Me〉以及用廣東話「多謝」嚟結尾。

殿堂級親善大使

雖然EPIK HIGH早已經係殿堂級組合，但3位親民程度⋯⋯筆者會稱佢哋為親善大使，記者會因為遲咗15分鐘開始，出場後，3位不停轉pose任影，完成記者會後，為表歉意，Tablo話想留低同一眾傳媒合照。話說筆者2年前同EPIK HIGH做完訪問之後，曾獲Tablo讚賞，當時以為佢隨口噏，誰不知，2年後再次交手，訪問後，Tablo不經意一句：「我記得你2年前同我做過訪問。」怕且唔會係隨口噏吧！世事就係咁「打耳」，紅日開工原來都可以好快樂。好！廢話噏完，轉返入正題。

智商170的浪漫詩人

可以介紹最近成立嘅High Ground唱片公司嗎?
Tablo：「High Ground可以話係YG首創嘅發展模式，EPIK HIGH喺當中扮演製作人嘅角色，公司唔會局限於韓國歌手，希望世界各地嘅歌手都可以嚟參與，發揮音樂才能。成立過程好順利，可能係因為唱片《SHOEBOX》做得幾成功，所以唔少人都主動話同我哋合作。」

EPIK HIGH 3位成員相識14年有多，可以講下對方優點同缺點嗎？
Tablo：「喺我眼中，其他兩位成員都冇缺點，佢哋好完美，唯一一個缺點係我。」
DJ Tukutz：「我同意。」

Tablo：「不過由於佢哋太完美，所以冇咩魅力，我就睇落有啲人情味。」

Tablo早前喺綜藝節目上，透過遊戲證明智商有170上，兩位認同嗎？
DJ Tukutz：「IQ同叻仔冇咩關係，佢嘅音樂係好出色，但始終係爭緊啲嘢，我覺得係人情囉！」
Tablo：「我做人嚟講呢，係有少少不足，我又唔係靚仔、又唔夠高、跳舞又唔叻，但係有咩所謂，大家都係人。」
Mithra Jin：「對我嚟講，做人需要完美。」
Tablo：「你都冇才華，哎！應該話兩個都冇。你睇Mithra Jin，佢只不過係坐喺度嘅一舊嘢！」

外間不時都讚嘆你哋歌詞如詩般浪漫，3位本身係咪浪漫嘅人？
Tablo：「對住鍾意嘅人會好浪漫，本身性格係鍾意1樣嘢就會癲咗咁投入，當真係成為我女朋友時，會對佢好好，但同我冇關係嘅女性，會對佢好冷淡。相反，Tukutz對所有女性都好浪漫，應該要對自己女人好啲嘛！」

做過最浪漫嘅事係？
Tablo：「對住囡囡Haru每一瞬間我都覺得好浪漫⋯⋯（例如係？）譬如同佢出街時，有車經過，我先將Haru拉埋一邊。」（說時Tablo起身做出指揮交通動作。）
Tukutz：「我人生出細到而家未試過跪低，但求婚時就會下跪，呢個係人生當中好大嘅1件事。」
Tablo：「由嗰日開始你應該差唔多要日日下跪。」
Tukutz：「你睇下我條褲，跪到穿晒窿！」（Tukutz當日身穿嘅牛仔褲千瘡百孔，所以當佢講完呢番話之後，全場人真係笑到有腹肌）

延伸閱讀

年度最強韓劇《製作人》

韓國新世代樓王

小嶋陽菜-禁室躉待