【張晨】《香港人去旅行之前，多數有咩未收拾？咪就係心情囉！》
廣告
【張晨】《香港人去旅行之前，多數有咩未收拾？咪就係心情囉！》
Text:張晨 Photo:電影截圖﹑Youtube截圖、Instagram
我發現香港人都患有「旅行前焦慮症」。
明明旅行係件輕鬆事，但佢都偏偏鍾意複雜化。
以執行李為例，
其實執幾件衫就得，唔夠咪去外國再買囉。
但佢就係要整個List，
連邊日著邊件衫邊對襪都要Plan埋(但之後並冇執行)。
叉電、風筒之類Double Check完再Triple Check，
每一日嘅交通行程都要通宵達旦咁不斷修改。
你會發現一個現象，就係「佢好似愈忙，就愈安心。」
覺得「忙就等於準備充足」。
彷彿如果太瀟灑，佢就會不安到極限。
睇嚟都係社會嘅錯。
香港嘅工作環境，令大部份打工仔覺得「忙等於好」。
呢種「窮忙」心態植根喺好多香港人身上。
估唔到，連「旅行」呢片聖地都受到污滅。
而最嚴重嘅病徵係佢喺旅行前一日，
仲要Check晒啲公司Email，
瘋狂地諗自己有冇做漏嘢，左騰右騰。
慢慢形成一個「最忙狀態」，
就係每秒都出現多一個新煩惱，然後去解決。
用「自製煩惱」去得到「解決煩惱」而生嘅安全感。
我真係戥佢辛苦，
因為生活嘅節奏同壓逼，連放下假都不得安寧。
難怪我哋好多人都有精神緊張，根本大家都未學識「好好去放一個假。」
一夜如何漫長，都總有完結之時。 去到「唔瞓唔得」嘅時間，佢依然再問一句：「死啦。仲有冇咩，我係未收拾好架？」
我諗一諗，答佢：「有呀。咪『心情』囉。」
佢苦笑，我陪笑。
內容延讀：
【張晨】《唯有透過Facebook，才知你活得如何》
>>> LIKE我們fb <<<
fb.com/newmonday.com.hk
