【編輯部嚴選】9大最想出現香港動漫人物展

今個暑假，好多超大名氣嘅卡通人物都「飛」嚟香港開展，唔止令到社交平台selfie數量同like數激增，重會造成「長頸鹿」現象：即係有啲人等自己最愛動畫搞展覽，等到頸都長。為咗幫咁多位「長頸鹿」望梅止渴，我哋嚴選咗以下9套從未喺香港搞過獨立展覽嘅動畫，呼籲各大商場單位「搞搞」佢，順便俾下橋，等《New Monday》都可以高掛抽水式「成功爭取」banner，為大家謀福利！9套動漫裏面，你又最想邊套嚟港開展呢？

Text-Oscar

1.杯緣子
日本OL杯緣子細細粒，但勁受歡迎！建議各大商場將阿杯緣子小姐變身成「大人國」，等fans感受下杯緣子嘅世界觀之餘，重可以同真人咁大嘅杯緣子selfie！

建議展出極罕嘅杯緣子，例如日本綜合節目《世界衝擊影像社》嘅副社長松子deluxe。

2.《Slam Dunk》
商場變成籃球場就一定唔少得，櫻木花道、流川楓等主角入樽、射籃絕對唔少得。不過識搞嘅，一定會將商場某部份，變成最出名「湘南江之電平交道」，重演晴子同櫻木嘅經典揮手場景。

3.玉桂狗
以白雲做設計藍本嘅玉桂狗，最叻就係用耳仔飛上天，所以商場除咗要放置（包括地面同懸掛）好多玉桂狗同一班朋友仔嘅雕塑外，重可以考慮加入「飛天」互動遊戲，等fans同玉桂狗一齊喺天上飛！

內容延讀：

＞驚到飛眼！史上最恐怖 Tsum Tsum 片

＞女神爭捧 IG曬蛋糕相！Lady M無奶油唔好食

4.五色戰隊
日本特攝片除咗《鹹蛋超人》同《幪面超人》外，五色戰隊亦係hit到爆。不過，五色戰隊系列最少都20套，逐套嚟香港又驚吸引力唔夠，不如索性一次過晒冷擺200幾個戰鬥員人偶，場面之壯觀一定不下於兵馬俑！

5.《進撃的巨人》
On no！呢套喺8月喺香港上映真人版電影嘅紅爆漫畫，原來未喺香港搞過展覽。要搞「進擊的展覽」，當然60尺巨人要作勢拆商場，艾倫、三笠、兵長等士兵飛去打巨人，場面一定壯觀！

6.《Street Fighter》
萬眾期待嘅《Street Fighter 5》電玩話會喺出年推出，同時間搞展覽係時機！展會當然要有機打啦，阿龍、阿Ken、春麗嘅1:1 figures亦唔少得，香港代表飛龍同Dan都要同大家見面，最好當然整個「Dan打敗赤目司令」嘅場景裝置，同香港人爭光！

內容延讀：

＞驚到飛眼！史上最恐怖 Tsum Tsum 片

＞女神爭捧 IG曬蛋糕相！Lady M無奶油唔好食

7.《Hunter X Hunter》
如果以每2-3年出10篇嘅進度，《Hunter X Hunter》應該可以持續到我曾孫個曾孫嗰代。不過小剛、基路亞嘅勇氣同毅力，依然招聚到一班fans，建議商場展覽除咗放figures外，亦可以check下大家嘅「念」，互動感大增。

8.《宇宙戰艦大和號》
之前好多船嚟過香港，有《One Piece》嘅前進號，亦有《高達》嘅木馬號，不過就好似爭緊隻代表船艦……無錯，就係70年代經典「宇宙戰艦大和號」！呢套經典動畫亦有推出過真人版電影，重要係木村做主角添！但無論邊個版本都冇可能整隻1:1「大和號」雕塑，因為就算大財力都無地方（編按：動畫版戰艦長265米，高77米，真人版電影嘅戰艦係動畫版嘅1倍），唯有睇下我哋嘅設計圖，好過無啦！

9.《亞基拉》
大友克洋嘅《亞基拉》，真正動漫迷一定睇過，尤其會記得嗰部cuber電單車，砌模型嘅朋友可能都有1、2架。商場想幫《亞基拉》搞展覽，只要擺部1:1原大電單車俾大家坐上去，加埋「古靈精怪改裝電單車展」，一定會爭住chok！

內容延讀：