古天樂半億購複式豪宅催財運！入行至今不斷行善！興建超過135間學校

撰文：神仙b｜圖片： 古天樂IG、google map截圖｜編輯：海月

古天樂購入半億複式豪宅催財運 入行至今「擁有」超過130棟物業

古天樂最近可以話係傳媒嘅焦點，古老闆係大圍環境唔理想嘅情況下，放出多部電影嘅預告，希望藉此重振本土電影市場。其名下嘅電影公司天下一又與其他電影公司一齊合作救市，可以話係為香港電影出錢又出力。

演藝事業如日中天嘅古老闆自然就有錢投資物業啦！有傳言話古天樂深信命理風水學，更獲得高人指點，所以近年密密手喺唔同地方買樓，最近嘅物業投資就係購入馬鞍山迎海複式豪宅，傳聞成交價超過半億！

該豪宅面積達3000呎，4房間隔，全屋採用智能設備控制家電，及有平台泳池。最正嘅係擁有無敵大海景，又設有私人電梯大堂，私隱度極高。

入行以來堅持行善 捐獻超過130棟教學樓

古老闆出曬名人又型、心地又善良。佢自2008年開始喺大陸捐建教學樓，至今超過12年一直冇停止過行善。有內地媒體統計，係12年間古天樂喺大陸一共捐建135間學校/教學樓。最近第133間教學樓已經落成啟用，仲有2間仍在建設中。

微博更流傳就算疫情期間，古天樂依然捐建咗4間學校，包括孫崗小學古天樂第132教學樓、城關鎮中心幼兒園古天樂第133教學樓、茂盛完小古天樂第134項目實驗綜合樓，及羊磴鎮古天樂第135教學樓。佢靠著善心成功「征服」咗挑剔嘅內地網民。