陳自瑤十年錫婚冷笑發表自強宣言：「我會變得更好」與王浩信恐再婚變

撰文：東方新地｜圖片：陳自瑤抖音、陳自瑤IG、東星圖片、新傳聞圖庫｜編輯：20｜原文刊於：東方新地

陳自瑤和王浩信近年多次傳出婚變，事業如日中天的王浩信，每次都與合作的女拍檔傳緋聞。即使陳自瑤曾為王浩信闢謠而夫妻現身，可惜此情境似乎難以再一見。剛過去的《萬千星輝頒獎典禮2020》，王浩信以大熱姿態再封帝，上台致詞時突然「多謝YoYo」，鏡頭立即轉向台下的陳自瑤，令陳自瑤的黑面「回應」大特寫於熒光幕前。雖然散場前全台候選藝人上台影大合照時，陳自瑤上前恭喜王浩信，但卻欠缺夫妻間的甜蜜、恩愛，只餘下公式化互動，事後陳自瑤甚至坦言唔會與王浩信慶祝。

陳自瑤冷笑發表自強宣言：「我會變得更好」惹起網民揣測婚變 — 陳自瑤發表自強宣言，引發網民無限聯想。

婚變傳聞再度翻叮

陳自瑤自從開通內地社交媒體抖音後，間中會拍片放上網，與網民分享生活點滴，日前陳自瑤自信十足對鏡頭講出：「我會變得更好，因為你，但不是為了你。」說完冷笑便昂首闊步行出鏡頭，陳自瑤呢番「我會變得更好」片段，立即引來網民無限聯想，紛紛留言問「是在暗示給王浩信？」、「還好是盲俠，要是聾俠就聽不見了」、「王先生…聽到沒？」更有不少網民追問二人婚姻是否出現問題，走出鏡外是寓意在婚姻中「離場」，令二人婚變傳聞再度炒熱。

視帝王浩信激罕公開多謝YoYo 老婆黑面回應

陳自瑤在08年拍《野蠻奶奶大戰戈師奶》邂逅年輕兩年的王浩信，二人拍拖3年即結婚，當時王浩信的名氣不及YoYo，但婚前卻被影到親自接送Cammi謝芷蕙到其家中逗留逾5小時，凌晨5時女方則殘爆離開。婚後多年間，王浩信先後同黃心穎、江嘉敏、蔡思貝等女同事傳緋聞，故一直盛傳YoYo早已對雙方婚姻死心，正辦理離婚手續。上月舉行的《萬千星輝頒獎典禮2020》王浩信再憑《踩過界2》奪視帝，在台上一番感言，竟然激罕多謝頻傳離婚的太太陳自瑤：

多謝太太陳自瑤。 — 致辭後段，王浩信望向藝員觀眾席：「多謝屋企人，多謝yoyo悉心照顧個女⋯⋯」

不過陳自瑤黑晒面，未知俾咩反應。 — 攝影師快狠準拍攝Close Up，不過陳自瑤黑晒面，表情僵硬沒作任何回應。

網民熱烈忖測陳自瑤「內心讀白」：個表情包含好多故事

對於這空氣凝固的一劇，成為頒獎禮最受談論的一幕，網友熱烈忖測Yoyo的內心讀白，加添不少想像：

陳自瑤凌晨出Po咁回應：

由於鏡頭前表現引起關注，陳自瑤於頒獎禮後表示要趕回家，結果在凌晨一點半於IG出Post，貼出了女兒留下的備忘「Please print worksheets and timetable. thank you 🙂 」，並留言表示：「回家還要替小寶貝準備明天功課，事業家庭兩兼顧，真的不容易！但我會盡力做到最好！Good night! 」

頒獎禮後YoYo表示要趕回家，在凌晨一點在IG出Po表示會做好「事業家庭兩兼顧」的角色。

被指與江嘉敏出雙入對盛傳陳自瑤死心搞離婚

早年憑《踩過界》封視帝的王浩信事業愈來愈好，不過入行多年婚姻一直傳出問題。近年忙於拍劇的王浩信人氣急升，其中一個導火線係2018年拍攝《兄弟》，盛傳王浩信與江嘉敏在英國出雙入對，不過亦曾有報道指王浩信已經收歛了不少，還跟同劇拍檔伍允龍返教會。

有指王浩信更向老婆陳自瑤提出接受婚姻輔導，不過YoYo對感情已經心淡，現正搞離婚。王浩信曾回應傳媒時話：「哈哈，流料，無回應。」

王浩信陳自瑤光棍日成婚

2011年11月11日上午11時，王浩信跟YoYo奉女成婚，在婚宴上老婆講感受感動到喊，王浩信溫柔抹眼淚。

生完囡囡冇幾耐，王浩信與YoYo一齊為劇集《飛虎》做宣傳，仲肯配合活動當衆錫錫耍花槍。

YoYo否認同王浩信離婚

陳自瑤(YoYo)同老公王浩信近年盛傳婚變消息，傳出主動提出離婚嘅係YoYo，她曾親身為離婚事件解畫，一口氣提出三點澄清：

「一直首先，冇提出過離婚；第二，我冇趕老公出門口；第三，我小朋友依然同我哋住一齊，好多各方面新聞，覺得唔係事實，亦覺得好笑。」

堅信王浩信會買樓贈自己

王浩信曾話打算買樓氹老婆陳自瑤，目標瞄準豪宅地段淺水灣，當時王浩信回應話距離目標尚有距離。榮升視帝，又話會代囡囡送禮物俾太太，就係獨立屋！後來王浩信卻以3306.6萬，購入清水灣傲瀧11座高層B單位，實用面積1,837呎，呎價1.8萬元，然而呢個單位係送畀媽媽，陳自瑤冇份，更有傳買樓一事太太全不知情。亦有傳王浩信故意唔寫太太名，他日離婚時不會被分身家。

YoYo曾澄清：「絕對冇，我係知道，我想話畀大家知，作為子女，送禮物畀父母係應該嘅事，點解大家要咁樣大造文章？佢（王浩信）係應承我，但係未必係o依家。我好多謝佢送咁厚禮俾我，我係好開心，相信佢應承咗我嘢，係一定會做，只不過今次係作為仔女，首先要孝順咗父母先喇，係咪？我覺得好應該，好正常嘅事。」

冇分居但承認一個住樓上一個住樓下

問到係咪已分居？陳自瑤話：「冇分居，(樓上樓下住？)其實係冇呢件事，不過可能係佢有個office，佢依家除咗拍戲工作外，仲有一啲生意，所以搵咗個地方做office，當然喺屋企唔方便，可能因為一件咁樣嘅事，令到大家有咁樣揣測。」即係樓上樓下？「係呀，我知道今日會見大家，所以咪希望一次過講，唔再一逐回應。」Yoyo拒用「恩愛」形容同王浩信夫妻關係，話只係「老夫老妻」。

陳自瑤王浩信最後大龍鳳

能共患難與富貴，並非人人都做得到，王浩信與陳自瑤(YoYo)近年多次傳婚變，空穴來風未必無因，男人要變心，女人忍得一時忍唔到一世。YoYo婚前一直受無綫力捧，與王浩信結婚生女後，她甘願做個平凡花旦，睇住老公王浩信扶搖直上，由三線攀上視帝之位，夫婦之間距離卻愈來愈遠，為了王浩信的形象與發展機會，YoYo對老公在外的緋聞一直逆來順受，每次有負面新聞，她都願意企出來做大龍鳳，事實卻是有苦自己知。

為個女啞忍

今次二人多次傳婚變，不少圈中人都不感意外，因為早已有跡可尋，據知情者透露：「Vincent(王浩信)近年緋聞多成咁，做老婆嘅點會心安，最弊就係Vincent一啲都唔避忌，舊年（18年）同蔡思貝傳完，佢仲攬住人出嚟影相話冇嘢，一啲都唔畀面YoYo，之後都仲唔避忌，真係唔抵幫㗎！大家都睇得出YoYo好想挽救段婚姻，自己幾唔開心都好，佢都陪Vincent出嚟硬撐，結果做完戲個老公順利拎埋視帝，但關係就未見好轉。Vincent 表面上話想同YoYo 生多個又承諾帶佢去旅行，全部都係得個講字，呢半年嚟成日都話忙，到近月拍完套《兄弟》冇劇開啦！都冇守每年一次二人世界旅行嘅承諾。呢幾個月到YoYo出埠拍劇，Vincent平時連電話都冇個。YoYo辛苦為頭家，返到屋企都想老公錫吓，但有等於冇，YoYo都係行內人，聽聽埋埋唔少Vincent啲嘢，好多姊妹都勸佢唔好再忍，YoYo 為咗個女好唔忍心，亦畀咗好多次機會Vincent，可能聚少離多，佢終於諗通再勉強落去都係冇結果，所以一返香港就同Vincent講清楚，仲叫佢即刻搬走。」

各自湊女

近年已不見王浩信一家三口現身公開場合，他為搶視帝洗底，不時湊女共敍天倫，本刊記者曾影到他帶女兒QQ到寓所附近踩單車，父女二人相處非常有愛。

之前王浩信對婚變之說的回應是：「唔係事實嘅嘢我唔想再回應啦！多謝大家關心。」其後他再表示近年信基督教，開始學識放下，明白要活在當下，面對愛情，他聲言會接受好與壞的情況，並認為婚姻一定會有困境，要學習同汲取教訓，認為珍惜身邊本來擁有的東西已經好快樂，因為是無價。冰凍三尺，非一日之寒，當老婆係草定寶亦只有王浩信自己知，不過可以肯定嘅係YoYo唔會再幫佢做大龍鳳，以後要力挽形象就要靠自己囉！

同女唔同命，王浩信努力維護蔡思貝，對同樣傳過緋聞的江嘉敏卻避之則吉，早前拍《兄弟》開廠拉大隊放飯，江嘉敏坐正隔籬，王浩信目不斜視九秒九扒完碗飯就走人，望都冇望江嘉敏一眼。

其實多年來，王浩信由歌手到視帝、由拍拖至結婚生女，緋聞從來冇停過，睇睇佢啲緋聞對象…

黃心穎

時間回到2015年，王浩信與黃心穎繼《再戰明天》後，再次合作拍台慶劇《東坡家事》，日對夜對自然熟稔。加上黃心穎出晒名電力十足，目標無分年紀，唔傳出緋聞就奇！

《東坡家事》好親密

王浩信同黃心穎喺《東坡家事》飾演一對小情侶，多對手戲、又有唔少親密戲是常識吧，有傳兩人在內地拍攝外景時「山高皇帝遠」，戲內戲外都過從甚密！當時有指陳自瑤嬲到分房瞓，雖然事後YoYo公開撐老公表示信任…

真係好老友咁喎！

蔡思貝

年前王浩信主演的無綫劇《踩過界》，口碑收視同樣佳，王浩信更憑「盲俠」一角首奪TVB視帝！此劇令王浩信攀上事業高峰，同時帶來另一單緋聞，有傳佢同劇中拍檔蔡思貝撻著，報道指一班劇集台前幕後相約打邊爐，但王蔡兩人匿埋入一間VIP房鎖門打邊爐，齊齊消失十幾分鐘。

否認入房打邊爐

消息傳出後王浩信大力否認，指每次打邊爐都係一大班人，另外又強調事件無影響自己同太太的感情，因為太太都知佢同思貝係好朋友。

江嘉敏

宅男女神江嘉敏喺新劇《兄弟》升呢做女一，同男主角王浩信有唔少對手戲，早前有報道指江嘉敏喺英國拍《兄弟》外景期間，主動姣黐人夫王浩信，即使返港後都頻頻主動聯絡男方！

江嘉敏唔避忌

江嘉敏被問到會否與王浩信保持距離，以免再傳緋聞，佢笑話：「都冇咩嘢要避忌，因為我同佢只係傾劇本同埋講吓啲感情戲點處理，如果咁樣都被人講，即刻要完全唔傾偈，唔講嘢！不過我媽咪都有問我單緋聞係咪真，我話『你話呢？』我媽咪知道我今次又係同劉穎鏇同房，都有叫我出入要同劉穎鏇一齊，因為佢高大，但我哋盡量都唔會外出！」

江嘉敏同王浩信曾在TVB西餐廳拍攝新劇《兄弟》，戲裡戲外江嘉敏都好主動，拍完一個shot，就表情多多不停撩人夫王浩信傾偈。另一日外景，江嘉敏亦一有機會就撩男方傾偈，反而王浩信表現避忌。

自薦幫王浩信搽油

二人曾接受《東張西望》訪問，王浩信話拍打拳戲期間，工作人員幫佢喺皮膚搽油不下數十次，在旁的江嘉敏笑話：「下次呢啲粗重嘢留畀我呢啲細嘅做！」王浩信聽到後尷尬笑話：「我嗰個年代啲女仔都唔係咁嘅⋯⋯」！

陳法拉

據知王浩信和陳法拉入行前已相識，二人同於美國讀書，在華人社交圈結識後拍拖，後來王浩信因家中生意失敗未能完成學業就先返港，並在一次卡拉OK中被唱片公司Neway發掘簽做歌手。

識於微時

知情者稱王浩信知法拉好想入行又鍾意唱歌，所以喺一次公司卡拉OK聚會，將法拉介紹俾自己老闆薛世恆識。

女友變老闆娘

點知薛大少冇簽法拉做歌手，但就追咗對方做自己女朋友囉！雖然法拉由女友變咗做自己老闆娘，不過大家都年輕，王浩信同對方一直保持唔錯關係。其實王浩信當年知名度好一般，同Neway大少的確冇得比，所以法拉… 你懂的。法拉和王浩信兩小無猜的一段情從此被冰封，而法拉和薛世恆由拍拖、秘婚都冚到實一實，直至離婚都繼續低調。

義氣助前度

早年陳法拉放棄如日方中的演藝事業到美國讀書，要支付高昂生活費、學費，又要照顧已退休父母，所以要頻頻各地飛搵銀。法拉早前又透露首次執導拍攝微電影，劇本也在飛機上寫，佢話：「第一次拍電影乜都自己搞，今次只係小本製作，只會預五位數字成本，今次拍咗好多膊頭，會搵大家識嘅人演出，佢哋都係義演。」其中一人就係人氣勁又有演技的前前度王浩信！王浩信對於識於微時的前度法拉，直言大家一直保持聯絡，開到聲可以的話都會幫拖！