【Cinema City現金券】戲院賣方卸膊苦主變人球！朗豪坊戲院現金券慘變廢紙 網民：好不負責任！

撰文：馬高斯 ｜圖片來源：朗豪坊FB專頁、Cinema City FB專頁、網上圖片｜編輯：海月

【Cinema City現金券】戲院賣方卸膊苦主變人球！朗豪坊戲院現金券慘變廢紙 網民：好不負責任！

就喺上年年中朗豪坊戲院Cinema City同商場合作推出活動，吸引市民去購買或用積分換領，100蚊面額嘅電影現金券。點知第四波來襲，12月2日戲院又再次停業，一班持有將於1月31日到期戲院現金券嘅苦主，將會眼白白睇住2月1日變成廢紙！

當然苦主們都有向戲院同商場查詢有無得退款或者延期使用，點知兩邊都疑似互相卸膊，戲院就話客人經商場活動購買，必須向商場查詢；另一邊廂，商場就會使用現金券嘅決定權喺戲院度。苦主慘變人球被踢嚟踢去，對今次事件感到非常不滿，認為對消費者好唔公平同唔負責任！

於是大量苦主連日嚟不斷喺Cinema City Facebook專頁留言表示不滿，有人就覺得政府應該介入調查。其實類似事件過去亦有發生，例如健身室、美容院嘅預繳式消費，其實至今都係無王管，並無方法去保障買方嘅權益。

Cinema City喺1月7日於Facebook專頁上聲稱，戲院停業間到期嘅電影換票證、贈券同禮券將會延期，請顧客留意該專頁，不過之後就無晒下文，未見有任何新消息。而最新朗豪坊就表示「為減輕租戶及顧客負擔，早前向Cinema City以正價購買現金券，而Cinema City則額外附送小食券，再由朗豪坊以禮品饋贈形式或優惠價發售，回饋顧客支持。價值數百萬元的現金券已全數付款予Cinema City」。而商場自去年底一直盡力跟Cinema City跟進「現金券即將到期」安排，惟Cinema City表示「已出售予朗豪坊的現金券將不獲延期或退款」。朗豪坊對此深表遺憾，更為答謝顧客，決定讓受影響顧客（有效日期為2021年1月31日的朗豪坊Cinema City現金券持有人），憑券到朗豪坊指定餐飲商戶，於指定日期內可作同等面值現金使用，使用詳情將稍後公布。