黃子華復出拍廣告短短2分鐘狂爆「搵食」金句訴港人心聲 細數子華神歷年超絕核金句
撰文：異種火星人｜圖片來源：Foodpanda廣告截圖｜影片來源：黃子華Foodpanda廣告
黃子華取代鄭嘉穎鄭嘉穎新一任Foodpanda廣告男主角
「子華神」黃子華闊別幕前一年多，直至上星期竟突然復出為外賣APP「Foodpanda」擔任廣告男主角，並以「Foodpanda 點止搵食咁簡單」為題，在1分鐘秒內狂爆「搵食」金句盡訴港人心聲；片中子華神著住一件卡其色長身外套，內襯一件白恤衫和一件深灰色西褲，貫徹其一向簡約風格。
1分40秒爆勁多金句 訴盡香港打工仔心聲
子華神在廣告中，率先指出：「香港人搵食世界第一！因為喺香港人嘅生活之中，搵食排名第一！搵食係精神，搵食係信仰，但係淨係搵食，倒頭嚟我哋搵到啲乜？」
1. 你搵到份工，你老豆老母搵唔搵到你？
2. 你真係好鐘意返工，有無時間搵鐘意嘅人？
3. 搵到餐餐九大簋，係咪已經捱壞咗副偈
4. 你搵到個錢，但係搵唔搵到樽鹽
5. 你搵到個首期，又有幾多時間留喺屋企？
細數黃子華歷年超絕核金句
其實多年來，香港人聽子華神金句又點止咁少，現就同大家一齊重溫黃子華在電影、劇集、甚至是棟篤笑等超絕核金句，作為「子華神徒」的你，又記得幾多？！
黃子華《乜代宗師》戲中10大金句
在電影之中，劇情一貫作風暗嘲熱諷，當中卻有不少如「拳證做嘢，唔使你教」、「啲水好醒，自己會搵路走」等名句，甚至連2019年成為全球票房冠軍的Marvel電影《復仇者聯盟4：終局之戰》（Avengers: Endgame）中，Tony Stark跟女兒Morgan在床邊一句的經典對白也有套用到，可見子華的電影有多潮！
1.「我哋點解要俾資訊、科技利用我哋；根本我哋都係受害者，他們係花生友」
2.「佢叫我打假拳，佢唔夠打就要打假拳」
3.「打得咁假，但的確係馬家功夫，我老豆從來都咁教我，唔通我馬家雷拳從來都淨係識打假？」
4.「你唔打女人，因為你驚俾女人打」
5.「一隻手唔夠攬個女人，你隻手留嚟俾自己用」
6.「啲水好醒，自己會搵路走」
7.「代代相傳，代代造假，假到連自己都信埋，死不悔改」
8.「無賽果的訓練叫「訓練」，有賽果的訓練叫「綵排」」
9.「拳證做嘢，唔使你教」
10.「I Love you 3千」
「黃子華棟篤笑」超絕核金句
1. 87枚「適當的武力」
「掟咗87枚催淚彈，梁振英走出來話:『警方係用咗適當嘅武力。』然後葉劉淑儀又出嚟講:『啲人有武器㗎，有把遮喎！』我唔知啲高官係點諗，唔係與民為善嘅咩？我知道你要保護警隊，但唔使下下分化得咁緊要。你可以話警隊專業，我亦相信警隊係專業，但而家嘅問題係，警隊掟催淚彈唔專業吖嘛？佢哋掟咗幾多次？香港太平盛世幾十年，10年都掟唔到1次，你10年冇煮過1次餸，你敢認大廚？」
2. 一場誤會
「如果我係政府，好簡單，當你警隊係專業嘅，但係掟催淚彈，佢哋係比較業餘嘅。冇問題㗎！等如抗議班人都係業餘，嗰班人唔係專業抗議者嚟㗎嘛！所以業餘對業餘，咁咪一齊誤會囉！和氣生財嘛！做到咁高位都唔識講？『係一場誤會！一場誤會！』咁咪搞掂。」
3. 「婆媳」糾紛
「香港回歸中國，就好似阿媽標個仔參，邊個俾贖金？當時係個母子關係，當時大家以為係。但而家已經唔係，變咗奶奶同新抱嘅關係…而家香港嘅問題，係婆媳糾紛，所謂婆媳糾紛，係種必然瀨嘢嘅關係，除非你老婆第1日入門就全心全意同奶奶講：『奶奶，我愛你！』唉呀！我講錯，對唔住，講多次，『阿媽，我愛你！』當然我哋係講唔出啦！係咪？」
4. 有得揸唔揸呀？
「有日，奶奶教訓新抱:『你第1日入門就藐嘴藐舌，而家你有咩就攤出嚟講！』於是新抱就問:『咁6月3日你去咗邊？』奶奶就話:『你講呢啲？』最搞笑係，新抱問奶奶，話之前明明講好過幾年俾佢揸fit，點知奶奶話佢聽錯，係揸lift唔係揸fit，其後奶奶繼續補充：「揸fit又係揸，揸lift又係揸，你唔係有得揸唔揸呀？」
5. 整容定毀容？
「你係佔中，定反佔中？係視乎你覺得香港個病有幾重。我曾經聽過1對男女嘅對話：『你想整容？整容可能變毀容喎！』嗱！信呢句嘢嘅人，好可能就係周融，『唔好亂搞嘢喇！會『毀融』㗎！』咁佔中嗰班呢？你聽埋第2句啦：『你想整容？整容可能變毀容，不過對你嚟講都冇乜分別啦！』香港點解會搞成咁呢各位？」
6. 正義撚出動
「我唔係講笑，嗰日坐喺旺角，隔籬突然有人問我：『我哋有壽司呀！重未壞，晏啲唔敢擔保。』你覺得熱，有人過嚟幫你噴嘢。『要唔要凍貼？』我唔知世上有凍貼呢樣嘢。『唔係貼喺額頭，係貼喺頸㗎！』然後有個人攞住廿樽水派俾人，一路派，一路跌，不過樽水1秒鐘就去番佢手度，1秒鐘！我真係未見過咁多咁義助嘅人！」
7. 香港中毒
「倒抽一口涼氣，係我細個睇武俠小說先睇到嘅字眼，通常啲中咗毒嘅人先會咁講，佢忽然瞓醒，見到有隻西域蜘蛛咬緊佢大髀，忽然倒抽一口涼氣⋯⋯不過呢啲字眼，而家喺香港成日聽到，點解？因為香港中咗毒。」
8. 生產力大晒
「啲人生仔就放前四後六，放幾個月假，死老竇就放1日，點解？因為所有嘢都係講生產力，你個仔生出嚟將來有生產力，你阿爸冇將來。屈原個仔死老竇有幾多日放？咪得端午節1日，佢重要包粽去賣，有生產力添！你諗清楚，生產力好緊要。耶穌出世有聖誕節，因為有生產力，咪放假囉！耶穌死係冇假放，然後耶穌復活又去放假，即係復活節。然後耶穌升天又冇假，升天係咩意思？退休移民，邊有生產力，佢重要唔買機票就退休，唔搭飛機都搭程的士去機場吖！咁就走咗，幾蚊雞生意都唔俾人做，邊有生產力。」
9. 100分的伴侶
「愛情同股票一樣，未入之前係不停咁升。但當一擁有，你就問：『點解會咁㗎？』所以世上有100分男孩、100分女孩，但就冇100分伴侶。如果重有人唔肯承認，相處就代表開始扣分，我有個例子：2人相愛，當然唔想有第三者，但點解你想生仔？『仔點會係第三者呀？』仔唔係人呀！喂，呢個第三者佔你哋好多時間㗎喎！呢個第三者，1日食6餐，隨時食埋你嗰份，『咁1男1女就梗係要生仔㗎啦！』係囉！點解呢？因為當世界只剩下1男1女，得番你同我，你就feel到，呢個遊戲係唔玩得耐。」
10. 入廁所過人世
「好多人話21世紀人腦會被淘汰，錯…21世紀係平板電腦年代，點解有電腦唔夠，要用平板電腦呢？（然後子華踎低，扮去廁所睇電腦嘅姿勢）係咪？就係要攞入廁所都睇得方便，而家啲人入廁所好似入少林寺咁，『我唔過關係唔會出番嚟』，不過我朋友阿強，佢唔過關都會出番嚟！因為冇電嘛！自此之後，阿強好醒目，喺個馬桶邊整個插蘇掣，年三十晚入去，人日都未出番嚟！」
11. 化妝喬裝
「一個女人化咗妝同落妝之後係同一個樣嘅，就叫『化妝』；如果唔同咗樣嘅，就叫『喬裝』！」
12.「老闆畀份人工你，一半係畀你做嘢嘅，一半係畀你受氣嘅。」
13.「現代嘅男人係奉行三不主義：不主動，不抗拒，同埋係不負責。」
14.「有恩不報未算差，有仇不報正人渣！」
15.「錯就要認！要對方認！」
16.「損人不利己，不如跳井死！」
17.「搵食啫，犯法啊？我想㗎？」
18.「男人希望女人可以『新鮮』，而女人，就希望男人可以『保鮮』。」
黃子華電視劇啜核金句
1.「識講法文有咩咁奇，喺法國，乞衣都識講法文啦 。」
2.「各位，『尊嚴』呢樣嘢已經跑輸大市，宜家「粗鹽」都貴過「尊嚴」。」
3.「我唔係身處於呢個歧視男性的時代，不知幾多人提名我去選美啊！」
4.「你放心，人人都危險，你很安全的。」
5.「我明白點解有愛情就會冇飯碗，有飯碗就冇愛情。因為我地將個愛情擺左落個飯碗度，只要我地起個飯碗入面夾番個愛情出尼，就會冇問題。」
6.「如果原則牽涉着數就係一個好嚴重嘅問題！」
7.「人生就如流星雨，短暫而美麗，如果你沒有時間談情，就請你跟我露營！」
8.「又如何！」
9.「返工不在乎天長地久，只在乎有冇得唞！」
10.「靚就唔駛扮，扮就唔謊靚」
11.「我一聽到返工兩隻字就頭痛，我一聽到交報告就腳痛，你話要隨傳隨到，我就全身骨痛。」
12.「點解每隻螞蟻都生得一模一樣？就係要老板認唔出佢哋，一個星期返6日工，其實係6隻螞蟻，1隻螞蟻返一日，所以我地應該向政府申請，一個星期返一日工，休息6天！」
13. 「半夜三更你當呢度喺動物園？得閒就入來參觀下，你當我蝙蝠啊？」
14.「我唔該你，唔好成日猜測我們人類喺度做咩，你翻去啄木啦！」
15.「我警告你，你再咁三更半夜走過來，我當你意圖侵犯我，我為了自衛，我成全你！」
16.「none of your business ..即係唔關你事」
17.「錢唔係問題 ，反正我無。」
18.「我好唔容易先維持到家徒四壁，擺咁多野，多一件又要多抹一件，我先唔制。」
19.「你睇吓個電視櫃有門，成日開門拎野你唔累咩？幾多家庭主婦一日到晚係咁抽筋，就係因為要開門拎野！」
20.「一萬蚊就肯定防彈啦，一粒魚蛋，無所謂啦！」
21.「你幾時變咗做馬桶？抽水果隻馬桶呀！」
22.「你呢種係永久性傷殘，注定孤獨終老。」
23.「你呢種係永久性黑心，因住無得終老。」
24.「英雄難過美人關，肥妹踩冧斷背山。」
https://youtu.be/jdeJVkv2rQw
