愛妻號森美自嘲野獸 結婚廿周年罕有放出與太太合照閃 森美：用一張簡單的相片，交換再多走二十年

撰文、圖片：東方新地｜編輯：八卦妹

森美結婚廿周年罕有放出與太太合照閃

森美同索老婆Veronica（陳雅嫻）早喺電台節目「叱咤殺戮新大陸」中認識，隨後於2000年結婚拉埋天窗，由於Veronica結婚後就退出電台成圈外人，森美為保護家人，甚少喺公開場合中提到家人。之不過，近年來，森美逐漸有所轉變，而直至今日森美竟罕有地放閃，原來喺二人結婚廿周年紀念。森美上載與太太喺迪士尼城堡前嘅合照，並留言表示：「公主城堡前發現野獸跟公主，二十年前沒有盛大的婚宴，仍能走到今天，就用一張簡單的相片，交換再多走二十年。」

圈中藝人、網友大讚森美夠Sweet 森美嫂夠索

森美上載相片短短4小時就已獲得3萬多讚，當中Aka（趙慧珊）、丁子朗、張名雅、黃翠如、6號（陸浩明）、蔡明思、麥美恩、林奕匡、何遠東等一眾圈中藝人均有留言大讚：「So Sweet」及留下心心圖案；而一眾網友則大讚森美嫂又靚又索，少女味十足：「嫂嫂好索」、「森美嫂仲係咁索 大哥好幸福啦」、「阿嫂？明明就係個𡃁妹」。

森美老婆愛得低調 曾因Post相放閃被老婆禁止

愛妻號森美早多年前極少談及妻兒，直至近年仔女開始大，且又唔太抗拒因爹哋而曝光，森美先開放態度多咗提老婆及仔女。

在2019年時，森美曾喺個人社交網上載與太太嘅合照，旋即引起不少熱話，有不少網友都大讚森美嫂Keep得好，但事隔數日後，森美接受媒體訪問時，就坦言自己因上載相片而比老婆話，仲話之後唔準再放合照到社交網上。

夫婦二人皆不拘小節貼地生活企街吃串燒

多年來keep 住索的森美嫂Veronica （陳雅嫻），打扮樸素一個人到九龍城買嘢，更不拘小節企街吃串燒。森美亦到盡顯廿四孝老公兼老竇身份，一支公去買餸，絕對係住家好男人。