5件感動700萬香港人的未來發明

text-Nam photo-網上圖片

01
帕金遜症病人專用馬桶Libue
James Dyson Award香港區冠軍，就係呢個專為帕金遜症病人設計嘅馬桶Libue，設計者係理工大學學生鄧曉瑩（Emily Tang）。由於佢祖父係帕金遜症病人，佢發現到原來好多病人，連去廁所咁基本嘅事都好難做到，所以設計呢個前後都用得嘅馬桶，當病人有需要時，唔使再擰轉身坐低，加上用輕觸式LED按鈕操作，同時有日式廁板咁嘅自動清潔功能，用落非常方便。至於一般人想用正常坐姿去廁所時，只要抽番起上面塊坐板就得，成個過程唔使30秒。

Emily話最難解決係馬桶要做到2合1呢件事，另外亦要控制成本到合理價錢，唔能夠太離地，故此用嘅技術都係已有，佢只負責將技術結合成新科技，呢方面又慳咗唔少錢。可能你會諗，騎馬咁去廁所，個個馬桶都得啦！但你只要自己試一試就知，正常人咁做已經難，何況係病人呢？其實Libue要造到坐得舒服又能2合1，背後過程非常辛苦，因此Libue已經得到唔少業內人士及公司肯定，連政府機構都已經搵咗Emily傾合作，據聞入圍國際賽機會好大。如果你個人唔膚淺，好有興趣知，不妨去Dyson香港官網睇睇，絕對有嘢學。

02
災場救援機Singa
由理工大學張健隆同學設計，目前嘅救災工作中，重型機器若惡劣嘅路面情況，好難順利通過，而且做唔到細緻操作，駕駛艙位置亦不利觀察地面情況。Singa解決咗以上所有問題，採用1個獨立嘅爬行系統，4個車輪可以單獨操作，就算崎嶇、凹凸不平嘅沙地表面，機器都可以行走。

內容延讀：

>今日冧咗女未？DIY進階版夜光星空瓶

>龍珠悟空亂入《街霸》你估下邊個係最後BOSS？

03
沼氣煮食爐MARCook
由理工大學張芷楓同學設計，香港堆填區即將飽和，廚餘就係城市固體廢物嘅主要成分，利用廚餘作為燃料煮食絕對係win win。MARCook就將廚餘儲存艙縮細，相比起傳統沼氣爐體積細咗50%，同時加入石油氣轉換系統，只需以1公斤廚餘，就可提供20至30分鐘煮食所需嘅氣體。

04
廢物單車冚Bike Raincoat
同樣係由理工大學張芷楓同學設計，唔同一般單車雨冚，大多數只係保護到座位同把手位，呢個簡單嘅雨冚，唔止包晒全架車，重係用廢物利用嘅PP物料袋縫製而成，唔用嗰時更有位俾你摺疊，放喺單車後面做座墊，慳位又有功能，量產嘅話，可以支持下。

05
視障兒童都玩得Zoo The School
由理工大學劉彥慈同學設計，呢啲動物公仔，都係俾6至8歲有視障問題嘅兒童玩，配合講故事應用程式，設計出玩具套裝。同時呢啲公仔都適合視力正常嘅小朋友玩，咁就唔怕視障兒童冇朋友啦。
James Dyson設計獎
國際決賽優勝者1名：
-優勝者可獲頒港幣350,000元
-優勝者就讀的大學學系可獲頒港幣58,000元
-James Dyson設計大獎獎座

國際決賽優異獎2名：
-每名得獎者可獲頒港幣58,000元

香港冠軍1名：
-得獎者可獲頒港幣24,000元

國際決賽入圍名單公布：2015年9月17日
國際優勝者名單公布：2015年11月10日
查詢：James Dyson Award 2015

內容延讀：

>今日冧咗女未？DIY進階版夜光星空瓶

>龍珠悟空亂入《街霸》你估下邊個係最後BOSS？