【為hehe論平反】 10大最激 木村拓哉 打車輪日劇

佢又衰豬嘅~~早兩日，日本偶像福士蒼汰為谷新劇《戀仲》亮相電視節目，咁啱 木村拓哉 亦同場宣傳新戲《律政英雄2015》，姣佬遇著脂粉客，造就兩代男神上演hehe場面。木村22年前喺經典日劇 《愛情白皮書》中飾演取手治，有幕講佢從後緊抱女主角石田光話：「我就不行嗎？」呢幕到家下都重係為人記得嘅經典場面，死人木村今次對手換咗係麻甩佬福士都咁鬼入戲，真係服咗佢，難為福士表現尷尬，場面極搞笑，呢兩日港日台都瘋傳呢段片段，個個都話木村勁有潛質做hehe！

唔制呀~~小編（男人嚟）係 木村拓哉 多年粉絲，佢主演嘅日劇差唔多睇晒咁滯，由當年信和地庫租帶睇《LV》（Long Vacation），到幾年後每逢星期三收工即趕去（又係信和）買配咗字幕嘅月九劇《LG》（Love Generation）嘅VCD，再到家下用手機睇《Hero2》，只有見佢攬女，從來冇話去搞仔仔嘅，家下就重溫10大 木村拓哉 經典打車輪日劇片段俾大家睇，耶~~真係好好睇㗎~~hehe~~

text – singh

經典10大 木村拓哉 車輪冇限冧！

第10、9位《從天而降億萬顆星星》

呢套02年4月播嘅月九劇，雖然搵嚟北川悅吏子編劇（《悠長假期》編劇），但都唔算話好大熱，事關劇情偏偏哋，講殺人懸疑嘢，而當時兩位女主角（井川遙同深津繪里）又唔夠一線，所以收視「媽媽地」，咁點解會入10大？事關木村喺入面同時同兩位女主角都有咀過，咁有艷福點都要重溫下！

第8位《月之戀人》

大制作呀，又林志玲，又話傳緋聞又盛，但劇又娘又慢，結果收視仆直兼cut到得番8集，慘慘慘！重要有林志玲唔咀咀另一主角篠原涼子，會唔會驚咀甩「痴ling」啲眼耳口鼻呢？XD

第7位《Engine》

05年套《Engine》其實我好期待，男人同賽車，條根永遠黐埋，聽到都腎上線素上升，想睇。點知套劇冇記錯得臨尾嗰集落過下場，冇電油味嘅賽車戲，點會有人睇？結果拎埋當年日劇金草苺獎「最爛男女主角」呀陰公！又不過，賽車手點都係型，雖然連女主角小雪都唔係好得，但小編鍾意車，係要俾佢入10大，吹咩？XDD

內容延讀：

>同木村咁型！碧咸帶領 5位球星最念念不忘紋身

>10大必回帶睇型爆CM 42歲木村滑過羅霖

第6位《Good Luck!!》（夢想飛行Good Luck）

連《衝上雲霄》都要抄佢，就知神級！女主角柴崎幸又揸機車又着N2-B軍褸加Red Wing，型都咁，真係女友排行榜首位啦，我都想咀番件呀！

第5位《an．an》

雖然唔係日劇，但講到木村經典咀咀，點都要數埋。98年㗎誌《an．an》搵嚟木村拍咗輯超激styling照，講真，着咩衫就唔多睇到，剩係見到留晒鬚嘅木村攬住個鬼妹又摷又咀，性感到不得了，但又非常有型，真係冇得輸.com！

第4位《Pride》（冰之驕子Pride）

查實呢套係小編其中一套好鍾意嘅木村日劇，事關以冰球為題材嘅劇唔多，同埋我一直覺得要大隻仔先打到冰球，睇到木材瘦奀茄咁都掂，係咪我都得呢？算！唔好諗，都係諗番女主角竹內結子，人家話佢似鄰家女孩，我唔覺，事關我冇一個鄰居係咁樣，算！最記得最後一集放晒燈花咁咀，um…希望快啲到大年初二！

內容延讀：

>同木村咁型！碧咸帶領 5位球星最念念不忘紋身

>10大必回帶睇型爆CM 42歲木村滑過羅霖

第3位《Long Vacation》（悠長假期）

其實係人都估到3甲一定有「Long核」《Long Vacation》同「笠精」《Love Generation》㗎喇，咁點解揀「Long核」第3呢？呀~~因為小編覺得木村喺呢套劇入面唔太型啦，所以就屈佢第3啦，係咁㗎喇，fan屎係「啷嚟」㗎啦，點吖！

第2位《Love Generation》（戀愛世紀）

第3「Long核」，第2咪「笠精」囉，呢套劇我睇過冇10次都有8次，但反而鍾意睇佢哋鬧交多過錫錫，同埋，木村用Porter袋着MA-1真係好型啊！

第1位《Beautiful Life》（美麗人生）

「人靚，劇正，慘慘哋，又好想睇，又幾好笑，又想喊，常盤貴子好靚呀，木村啲好型呀，呀，咀喇，好好呀，好溫柔呀~」以上係當年小編女朋友睇住套劇講嘅嘢，集集講，不停重覆講，中個降頭咁，完！

內容延讀：

>同木村咁型！碧咸帶領 5位球星最念念不忘紋身

>10大必回帶睇型爆CM 42歲木村滑過羅霖