你懷念嗎？10件必定勾起你那些年回憶嘅舊文具

愉景新城啱啱舉辦第2屆「淘」書節暨「復刻校園」珍藏展，展出由本港著名文具收藏家鍾燕齊同香港教育學院香港教育博物館借出嘅200幾件唔同年代特色文具，包括手提書喼、特色鉛筆刨…以下呢10樣絕對能勾起你學生時代美好嘅回憶。

text-Jessie photo-Billy

1. 鐵皮鉛筆刨

鐵皮手動鉛筆刨，60年代德國製。喺塑膠出現之前，好多文具同玩具都係用鐵皮造，而家好多人都搵番啲鐵皮車、鐵皮機械人嚟儲，鉛筆刨就比較少見，同樣好有味道。

2.足球擦膠

80年代隨住《足球小將》嘅興起，同埋香港足球壇嘅好成績，全城足球熱，市面上亦出現好多足球產品，擦膠當然唔少得，係要帶返學威威嘅必備item。

3.老師印章

4、50年代印章盒同印章，內有學生姓名、科目名同埋常用字詞包括「見老師」、「欠交」等。

4. 明星筆盒

印有明星個樣嘅筆盒，絕對係要帶返學炫耀嘅物品，特別係80年代日本明星喺香港極之流行嘅時候，就曾經出現一啲有日本偶像個樣嘅肇盒，包括偶像松田聖子（上）同男子組合SHIBUGAKI苦柿隊（下）。

5. 玩具鉛筆刨

同玩具結合嘅文具永遠都好受小朋友歡迎，例如呢個可以撳啲彈片令膠珠彈彈下嘅鉛筆刨咁，而家睇起嚟唔知有咩咁好玩，不過喺小朋友嘅單純年代，呢類型嘅嘢都足以玩一段時間。

內容延讀：

＞PEACH JOHN聯乘MARVEL、DISNEY出變身家居服

＞猛鬼街導演WES CRAVEN４套經典影響全球恐怖片

6. 「變形金剛」筆盒

呢個就唔使多講，好多小朋友都曾經好恨買返個，但係媽媽通常都唔輕易答應買，因為怕上堂分心同埋比一般筆盒貴，不過以前會覺得有個愈多功能嘅筆盒愈有型。

7. 高貴太空喼

呢個就係70年代最經典嘅膠製書喼，由Apollo公司出產，由於價錢高昂，絕對係當時小朋友身分象徵。另亦有展出由紅A生產嘅款式，體積較細同埋售價較平。

8. 立體卡通造型鉛筆刨

鉛筆刨可以話係造型最百變嘅文具，喺以前以鉛筆為主要書寫工具嘅年代，筆刨又點少得呢？1個型嘅鉛筆刨就更加要有。呢款係80年代電影《E.T.外星人》入面主角外星人造型鉛筆刨，電影喺當時極受歡迎，直至今日成為一大經典科幻電影。

9.暴走貓鉛筆

呢盒係曾經紅極一時嘅「佐藤又吉」鉛筆，佢係80年代以暴走族造型打扮嘅標本貓貓，係真貓嚟，出過寫真書、EP同好多周邊商品，最近日本嗰邊都重新推出佢哋嘅產品。

10.百年圓規

有過百年歷史嘅圓規套裝，係當年歐洲人嚟香港大興土木時使用過，黃銅製造。鍾燕齊話：「以前粉嶺一帶有好多售賣英、德製文具嘅文具鋪，比喺中、上環嘅更貴更高檔，因為97前英軍軍營設喺嗰頭。」

愉景新城第2屆「淘」書節暨「復刻校園」珍藏展
日期：即日至9月7日
時間：12:00nn-8:00pm
地點：荃灣愉景新城
費用：免費
查詢：2940 2822

 
內容延讀：

＞PEACH JOHN聯乘MARVEL、DISNEY出變身家居服

＞猛鬼街導演WES CRAVEN４套經典影響全球恐怖片