香港MVP陳德恩 打出名堂8件事
text – Lok（ig：loklokb1021） photo –Jacy
1. 而家全香港都知你叫「BIRDMAN」，真係打出名堂，到底點解你叫「BIRDMAN」？
「紋身，因為NBA有位全身紋身嘅球員Chris Anderson（圖）外號『BIRDMAN』，而香港籃球界好少人好似我咁有咁多紋身，所以身邊嘅人見到我自然會聯想起Chris Anderson，慢慢就開始叫我『BIRDMAN』。其實自己都有受佢嘅影響，落力練習防守，同埋欣賞佢喺場上嗰種拼勁。」
2.活動中見過幾位NBA球星，有咩感覺？
「先講Kobe，Kobe係個好注重細節嘅人，佢要每個訓練、每個動作都好準確，呢種態度好值得學習。LeBron就係我偶像，之前都見過，但以球員身分見佢就係第1次，感受到佢嘅霸氣，企佢後面嗰種壓迫感成世人都會記得。Paul George俾我嘅感覺反而好玩得，同佢嚴肅嘅外表好唔同，好friendly。」
3.「打出名堂」之中邊位成員最受歡迎？
「我覺得係Alan（林陸偉），佢係個開心果，好玩得，大家圍住佢嘅時候全部都係笑聲，帶俾大家好多正能量，所以佢離開時，好多人都好唔捨得。」
4.「打出名堂」之中，最難捱係乜？
「其實成個旅程對我嚟講都好艱辛，因為每個人都想表現自己，好多時都盡量爭取機會展示個人技術，少傳波。但我反而係屬於團隊為先嘅球員，我會分波、做單擋，但始終冇波在手冇機會去表現自己，覺得自己好被動、好難捱。點知選入10強之後教練同我講，我做嘅嘢所有人都睇到，即刻明白所有嘢都冇做錯。」
內容延讀：
＞JORDAN BRAND TAKE FLIGHT INVITATIONAL 香港籃球可以大搞喎！
＞【跑友必睇】NIKE RUN CLUB 大中華全面升級
5.「打出名堂」之中，最難忘係乜？
「最難忘一定係LeBron頒件衫俾我（『打出名堂』第6集，圖），當時心入面已經預咗3個香港代表都會出局，只得1個晉級，但真係冇諗過係自己，個spotlight一打落嚟我對眼係白哂，跟住LeBron就好似個黑影由白光入面行出嚟頒件衫俾我，由偶像手上接過件衫，嗰刻真係真情流露咁喊咗出嚟，難忘係因為嗰刻真係覺得咁耐嘅努力係冇白費，係個肯定。」
6. 「打出名堂」之中，最後悔係乜？
「以團隊嚟講，我覺得自己未能夠推到Alan（林陸偉）入10強係個遺憾，唔多唔少我都有責任，我覺得自己push得佢唔夠，球場上嘅表現我幫唔到佢，佢嘅態度可以再調整得好啲，但我嗰刻冇做到，有啲後悔。」
7. 會唔會因為「打出名堂」而紋一個身？
「會，其實我個籃球夢已經好完滿，過程中已經打算紋『打出名堂』嘅logo，而家就決定加埋『MVP』3個字，呢個應該會係我人生第1個彩色紋身，就好似我嘅籃球故事一樣，今次為我張白紙畫上色彩。」
8.「打出名堂」之後嘅人生係點？
「『打出名堂』對年輕人嚟講可能係個跳板，但我唔年輕，對我嚟講，我唔會好執着去向職業籃球發展，當然有機會就一定會考慮，但冇嘅話，我都一樣會打業餘籃球。反而我想將我學到嘅態度放喺紋身上，因為我覺得呢份態度放喺唔同範疇都有用，我亦都可以喺紋身界打出自己嘅名堂。」
內容延讀：
[…] ＞香港MVP陳德恩 打出名堂8件事 […]
[…] ＞香港MVP陳德恩 打出名堂8件事 […]