【入得廚房 出得廳堂】零添加女神朴信惠 愛的宣言（靚圖）
廣告
韓國女星朴信惠月中首次喺wtc more世貿中心舉行簽名會，雖然活動當日接獲爺爺過身消息，但朴信惠喺活動上依然笑足全場，返酒店小休之後，繼續接受媒體訪問，能夠如此敬業，難怪近年合作過嘅李敏鎬、金宇彬、李鍾碩等大勢男神都對佢讚不絕口，甚至係早前喺綜藝節目《三時三餐》上，朴信惠只係以幾道簡單小菜，就已速奪奄尖主持人李瑞鎮嘅歡心，有外表有內在，坐穩新一代女神寶座。
10年成長
先後同李敏鎬、金宇彬、李鍾碩、張根碩等人合作過，兼成為好友，當中可曾有其理想型在內？朴信惠只透露希望自己另一半需要有責任心、重視家庭、感情豐富以及會照顧佢，要求其實唔算太高，但就連佢自己都話唔知呢位「他」幾時會出現。童星出身嘅朴信惠，入行10年，坦言當中有唔小改變。「出道多年，總會有攰嘅時候，平時感到有壓力時，盡量唔會積埋喺心，會聽下音樂或者同朋友見面，咁樣會比較易回復精神。（呢10年最大改變係乜?）以前一邊拍戲一邊返學，其實都幾辛苦，而家雖然都會辛苦，但因為想試、想學嘅嘢多咗，亦識得點去減壓，對我嚟講，算係最大嘅改變。」
最想有份工
對於自己出現喺綜藝節目《三時三餐》後，由於非常煮得，加上又肯主動做家務，令兩位男主持陷入着迷狀態，更要求朴信惠成為固定主持。朴信惠表示雖然鍾意睇綜藝節目，但自覺藝能感比較弱，所以出演的話，可能會好吃力，當然，有機會都想嘗試啦！至於喺角色上會否再有突破？大概係受到《Pinocchio》嘅影響，所以想做女強人。
「到目前為止，我多數都係飾演同我年齡相符嘅角色，而且多數都好陽光，《Pinocchio》算係我第1次有職業嘅角色，之後如果有機會想試下更女性，或者係專業嘅角色，例如醫生、刑警咁。（咁多角色中，邊個最滿意？）每部作品都有令我成長、令我學習、令我珍惜嘅地方，每參與一部作品，我都感覺自己有跟隨角色一齊成長，所以每次都會因為有所得着而感到好滿足。」
[…] ＞零添加女神朴信惠 愛的宣言（靚圖） […]