運動女生TELL YOU WHY：我的理想 – 跑遍全世界！BY T.LUM
【女生專屬byT.LUM】（IG: Teresa_Lum）
「搶到啦！搶到啦！我應唔應該去馬呀？」跑手A問。「咁難都爭到，唔係唔去馬呀嘛？」跑手B反問。跑手界之間當然唔係搶3C智能手機，更唔係搶優惠機票，而係搶海外馬拉松比賽名額。
香港跑步風氣雖然盛行，大大小小嘅各類型跑步比賽亦好多，但好似「隔離飯香」，唔少跑手都不惜請假，訂晒機票酒店，目的就係可以到外地參加海外馬拉松比賽。
RUN THE WORLD相信係好多跑手嘅夢想，筆者亦有幸到過台灣、上海、廣州，同最近嘅多倫多參加海外馬拉松比賽。相比起其他跑手嘅遊歷當然係小小毛見大毛，而我嘅「To Run List」當然仲有好多：日本、三藩市、吳哥窟、韓國等等，都係跑手界認為 – 跑步人必須跑過嘅地方。雖然我跑過唔多地方，但你只要參加過一個海外比賽，之後你就會有千萬種理由叫自己繼續搶報名名額、請大假唔返工去外地跑步、洗錢訂機票酒店去海外比賽，以下就總括下點解去外地跑馬拉松咁吸引。
原因一：跑步係好好去遊歷城市嘅方法
平時去旅行，自由行嘅多數睇旅遊書，去得嘅多數係出名旅遊景點，跟團去旅行更加唔洗講，猶如趕鴨仔嘅行程。但去外地參加馬拉松比賽，就可以用雙腳跑過好多大街小巷，經過城市嘅地標，又或者本土嘅地方。用自己跑步嘅步伐去遊歷城市，更好嘅係，有人幫你封晒路，慢慢跑過馬路大橋，夫復何求。
就好似係剛過起嘅WE RUN TORONTO，我地要搭船去Central Island，呢個猶如環島跑比賽，15公里，差不多90分鐘，我用雙腳慢慢跑過半個島嶼。跑過同見到一幕幕嘅風景，有山有水、有草有海，仲要跑過機場跑道旁。如果自己去旅行，應該無咁嘅時間去行15公里。
原因二：馬拉松比賽絕對可以感受當地風土民情
要感受當地風土民情，最好從當地居民開始。自己去旅行，如果住民宿，有機會認識當地居民，同佢地傾下計，當然係好好嘅方法。但估唔到嘅係，其實你跑馬拉松，亦一樣可以感受到當地嘅風情。
好似之前去過嘅上海馬拉松比賽，沿路都有好多姨姨著晒中國服裝，手拎大扇，旁邊仲有傳統中國大鼓同樂器，同沿路嘅跑手打氣加油。而聽聞係日本跑馬拉松，沿路市民唔單只熱烈支持，仲會整埋飯團同帶埋能量食物同大家打打氣。真係唔跑都唔知其他國家嘅風土民情原來係咁。
原因三：到陌生地方感受跑步嘅MAGIC MOMENT
所謂Magic Moment，就係當你跑跑下步，腦袋完全無左其他雜念，聽唔到旁邊人聲車聲雜聲，剩返自己嘅呼吸聲，而身體開始同自己對話，彷彿跑道上只有你一個人，雙腿繼續跑動，但心境情緒係出奇地平靜。
最神奇嘅係到外地跑步，可以用比賽嘅時間，係陌生嘅國度感受到跑步嘅Magic Moment。猶其你唔知自己身處何方，身邊人同物都好似與自己無關，無壓力嘅情況下好好享受跑步嘅樂趣。
記得上年到台灣跑WE RUN TPE，雖然夏天，雖然好熱，雖然要跑大斜路，雖然身邊有幾千名女生參加者，但因為係一處陌生嘅地方跑21公里，跑到一半已經感受到跑步嘅Magic Moment，慢慢已經開始忘記疲累，享受比賽之餘，係餘下10公里仲可以越跑越快，最後做出PP時間，簡直係Bonus。
原因四：跑步為一趟旅行加添意義
其他女仔去旅行目的可能係去瘋狂購物，瘋狂吃喝玩樂。運動女生旅行嘅意義，係同一班閨蜜一齊去外地Carbo. Loading – 都係狂食，再係第2朝一齊跑完半馬，一齊向同樣終點進發，跑完之後再一齊慶祝，大吃一餐。
運動女生決定到外地跑個馬拉松嘅思考時間可以係短短一個晚上，一個晚上後已經可以確定相約定機票酒店，向公司請假，因為我地知道呢趟跑步旅行嘅意義重大到無其他野要考慮。
筆者慶幸嘅係係今年可以同一大班運動女生完成WE RUN TPE，這比起以平價、優惠價瘋狂購物，意義來得更重大。
到外地跑步有佢嘅神秘魔力，所有遊歷、風景、體驗、旅行意義雖然無形，但統統都唔能夠用金錢來衡量。
我諗每個跑手屋企都應該有幅世界地圖，每到一個城市跑步，就係世界地圖上插旗，終極目標唔係環遊世界，而係跑遍全世界。
T.LUM
1個鍾意做運動嘅女生。做運動好簡單，只要鍾意嘅、喜歡嘅、想試想做嘅，就可以行動。
內容延讀
[…] ＞運動女生TELL YOU WHY：我的理想 – 跑遍全世界！BY T.LUM […]