胭脂點樣搽？識得搽，包包面都冇埋！

text-Edelweiss （ig：lovedelweiss） photo-網上圖片

搽胭脂要夾面形

瓜子面&鵝蛋面
瓜子面同鵝蛋面係最完美嘅面形，面形線條流暢，輪廓均稱理想，咁好睇嘅面形，就梗係冇修飾嘅必要，所以唔搽胭脂都冇問題。即使五官平凡，但有瓜子面同鵝蛋面嘅女仔，都會係個唔錯嘅靚女。

胭脂重點：可以根據唔同埸合，搽出相應嘅胭脂，改變妝感。

基本畫法：首先微笑搵出蘋果肌，用畫圓方式掃上胭脂，最後喺胭脂邊界打圈暈染，製造白裡透紅嘅感覺。

圓面
圓面嘅人唔止塊面圓潤，冇乜線條感，面形亦都較寬闊，令輪廓睇起嚟扁平冇立體感，好易俾人baby fat或者肥妹仔嘅錯覺。幸運嘅係，可愛嘅圓臉俾人1種親切、天真、活潑嘅感覺，親和力十足，容易得人鍾意，討人歡心。

胭脂重點：用長斜線方式掃胭脂，強調面形線條感。
建議畫法：由耳際位置，往面頰45度角打斜掃上胭脂，拉長面形。

長面
長面又叫「馬面」，面形偏瘦長唔夠柔和，通常分為額頭過長、下巴過長同顴骨過窄3種。長面嘅人雖然俾人聰明、成熟、理性嘅感覺，但個樣睇起嚟就比實際年齡大，容易顯老。

胭脂重點：用橫長形方式掃上眼底胭脂（可參考宿醉妝），增加面頰寬度。

建議畫法：由顴骨位置，往眼底方向打橫掃上平圓狀胭脂，胭脂唔可以搽低過面頰，縮短。

方面
方面線條感重而直，額頭、面頰過寬，令到面形顯得四四方方，輪廓分明，擁有強烈嘅稜角感。呢種面形充滿個性又有現代感，俾人意志堅定同倔強嘅印象，但就少咗啲女人味同溫柔感。

胭脂重點：用斜圓線條方式掃上胭脂，減低線條感同面頰寬度。

建議畫法：由顴骨位置，往鼻子方向打斜掃上圓狀胭脂，再喺腮骨位置用胭脂打陰影，縮窄面形，增加柔和感。

內容延讀：

＞按走包包面？台灣美容教父牛爾4招抗老按摩法

＞飲埋4款滋補潤肺湯水，胭脂都搽得貼啲！