【我頂！真係趣乒乓！】用頭頂嘅table tennis你玩過未？

我哋除咗訪問咗Headis「老竇」德國人René Wegner，重由德國訂咗Headis專用波，請嚟港超球隊太陽飛馬嘅葉頌朗、陳文輝，再加香港花式足球界no.1嘅施寶盛同佢拍檔馮國謙，嚟個Headis大對決！

text – Jessie photo – Jacy、由被訪者提供

創Headis只因冇波踢

René話，佢發明Headis絕對係無心插柳：06年佢讀緊大學嘅某日，本來興高采烈咁同啲朋友去球場踢波，點知去到發現冇晒場。佢哋見到附近嘅乒乓波檯，就諗不如用足球當乒乓波玩住先！但又覺得用手打冇乜新意，René於是建議齋用頭頂，玩到個個都停唔到。
呢個game慢慢由大學傳到全歐洲，佢重成立官方組織「Headis Trendsports UG」。René話：「Headis係好容易上手嘅運動，唔係運動健將都一樣玩得，女仔都可以玩得好好。而且就算你冇專用波，只要用啲彈力好而輕嘅波代替都得，所以係好彈性嘅運動。」

入門解說：「Pat Pat坐低啲。」
René話Headis規則同乒乓波係一樣，唔同嘅只係以頭代拍，而且身體各部分都可以觸檯。「我建議初學者可以放對手喺檯度撳住嚟借力，之後向後退1、2步，膝頭微曲，pat pat坐低啲，咁樣用頭扣球嘅控制力度同位置都會易啲，最緊要盡情享受個game，玩得多，自然會有進步。」René重話自己玩咁多年Headis都未曾喺過程中受過傷，如果想萬無一失，初學者最好先慢慢搓下波，熟啲先慢慢加快速度。

專用波好好彈
Headis發源地係歐洲，係最新興嘅運動，喺好多國家如捷克、瑞士、比利時、法國等都好受歡迎，每年夏天更會舉行世界盃。佢嘅專用波比乒乓波大好多，直徑7吋、重100g，而比足球輕4倍。佢由軟膠製造，又輕又腍唔會頂傷個頭，重好有彈力。1個膠波雖然要賣成14.95歐元（即約$127），係貴咗啲，不過經歐盟安全測試，玩得安心啲。

訂波官網

 
內容延讀：

＞同樣嚟自外國嘅瘋狂障礙跑CRAZY INFLATABLE RUN

＞8月有得玩嘅SLIDETHECITY HK千呎滑梯

港超隊 vs花式隊 Headis大對決！
講咗咁耐，到底Headis有幾好玩？我哋就請嚟一班「頭槌專家」：太陽飛馬嘅葉頌朗、陳文輝，同花式足球王者施寶盛及佢拍檔馮國謙，最強對最強咁切磋一下！經過猜team之後，陳文輝對施寶盛，葉頌朗就對馮國謙，打11分嘅世紀頭槌之戰隨即展開！

Round 1

Round 2

4大高手再傳玩Headis心得

陳文輝：
「我覺得幾好玩，因為好新鮮，平時踢波都會頂下頭槌，但呢項運動由頭到尾都係用頭頂。玩嘅時候坐低啲，就會易頂好多。呢項運動幾好，唔使好似踢波咁要走動咁多，老少咸宜。」

施寶盛：
「玩法非常之新鮮，好正。個波比較腍，頂落個頭度冇足球咁痛。而且個專用波體積較細，除咗用頭頂之外，用嚟練腳法都非常適合。過程中捉緊時間同埋估計個波嚟嘅方向比技術更重要，如果預測到球嘅方向，就好容易可以接到。力度控制方面較難掌握，因為大力少少就會頂出界。」

葉頌朗：
「我覺得非常之好玩，但係玩嘅時候要留意番，因為Headis專用波同足球唔同，有好強嘅彈力，頂嘅時候要小心啲，因住啲力，都幾難控制，一開始都要啲時間嚟搵適合嘅力度大細。」

馮國謙：
「我都係第1次接觸Headis，感覺好得意。玩完之後，我覺得佢較着重控制同集中力，因為個波有好強嘅彈力，一唔集中，個波就會飛到好遠，唔知去咗邊接唔住。」

外國嘅Headis球手已經玩到出神入化，可以用頭控制個波控制得非常自如，官方整合咗德國Hamburg 10大精采對決時刻，從影片中可睇到佢哋有幾勁！

官方拍過1條片，用3分鐘教大家點玩Headis，都係睇片先知，原來可以5個人同時一齊玩。雖然段片用德文冇字幕，不過從佢哋嘅肢體動作都大概睇得明。

 
內容延讀：

＞同樣嚟自外國嘅瘋狂障礙跑CRAZY INFLATABLE RUN

＞8月有得玩嘅SLIDETHECITY HK千呎滑梯