爽死poolsoccer！ 用腳代cue玩桌球

足球，代表激情；桌球，需要冷靜，呢個運動界嘅「矛盾」，溝埋一齊會唔會有「瀨尿牛丸」嘅化學作用呢？
最近出現咗1種叫poolsoccer（桌上足球）嘅運動。照字面解，玩家需要用雙腳代替cue棍打桌球。咁過癮，我哋就搵嚟2位太陽飛馬嘅球員：唐建文同葉頌朗，再加上教練郭嘉諾試玩，點知一落場佢哋就玩唔停，3個大男人重不時密密斟。「因為想贏就要同隊友多啲溝通，足球同桌球都係好講策略嘅運動，將兩樣乘埋嘅poolsoccer就更加啦。不過，如果just for fun嘅，其實唔難上手，男仔女仔都啱玩。」
好！今個weekend就約阿珍妹過嚟搓住波拍拖，唔使下下行街睇戲咁齋！

Text-Oscar photo-Tung special thanks-Puma

自製poolsoccer檯

5月初開業嘅BALL ROOM，係全港首個引入poolsoccer嘅「球場」，負責人之一嘅Samuel話：「我同生意partner Kase係中學同學，大家諗住夾份做生意，就上網搵靈感，結果搵到poolsoccer。起初我哋諗住搵法國原創者傾代理，不過佢叫我哋自己搞，於是咪膽粗粗搵香港師傅整。」

Poolsoccer嘅「波檯」係張放大版嘅美式桌球檯，原創地法國嘅檯長6米、闊3米，全木製，再喺上面鋪上綠色絨面地氈，但Samuel話原創人俾佢哋「自由創作」，所以佢哋親身試過20幾張唔同大細同物料嘅波檯，經過20幾次改良，先有今日嘅波檯：「張波檯除咗用料實淨啲外，亦會相對地彈性冇咁強，較易入波。」

Poolsoccer用嘅「桌球」係16個唔同顏色嘅「3號」足球，顏色按照美式桌球製成，Samuel補充：「不過，由於一般足球彈力太強，好易『撻死』（飛出檯邊），所以我哋用嘅足球較市面上一般嘅足球重，等啲波冇咁易撞飛。」

跟美式桌球玩法

Poolsoccer嘅規則跟足美式桌球，分為「8號波」同「9號波」2種玩法。「8號波」係雙方鬥快射波入洞，先入一方無論係入咗實色或間條，對方就要打另1種顏色嘅波。兩者鬥快清晒自己所屬嘅顏色波後，打入埋8號（即大家所講嘅黑柴）就贏；如果中途錯誤打入8號波就即時判輸；如果「撻死」、打唔到波或打中對方顏色波，對方就可獲自由球，可將白波隨意擺位。

「9號波」玩法就係順次序打晒1至9號波。不過，未到打9號波嘅時候唔小心打入9號的話，亦即判為輸，而其他規則同「8號波」一樣。

Poolsoccer重有多1個玩法：雙打，同樣按「8號波」或「9號波」嘅玩法，但同team隊友可以傳球，而接應嘅隊友要喺個波停定前加1腳射洞，唔可以途中踩定，即係玩「合作技」。照記者觀察，雙打較難做到「set cue」，因對方可以傳球解圍；同時因為可以傳球，令隊友間必須傾好作戰策略，較一般桌球變化更大。

內容延讀：

＞做運動梗係要有波鞋，睇下呢10對啱唔啱你心水

＞學埋波鞋街術語就唔怕買鞋會被人呃

基本功：「要輕輕力！」

Poolsoccer同足球一樣，可以用嘅技巧都差唔多。我哋當然要請教3位專業人士啦！佢哋試玩後話，最緊要唔好大力踢白波，因為就算係特製足球，彈力都勁好，好易「撻死」，要輕力咁玩先OK。另外佢哋都話，球員嘅身體，特別係雙腳嘅定力好緊要，否則好易射歪。

同踢波一樣，poolsoccer需要穩定高嘅傳球或射門方式，所以好似用腳尖咁較易令個波有旋嘅方法就唔太適用。當然，如果你有信心嘅，咩方法踢都唔係問題！

內容延讀：

＞做運動梗係要有波鞋，睇下呢10對啱唔啱你心水

＞學埋波鞋街術語就唔怕買鞋會被人呃

高級班 教你玩埋花式

美式桌球亦稱「花式桌球」，為咗避波同入波，可以用好多eye-catching度高嘅技術。Poolsoccer亦一樣，你諗得出嘅方式都可以，最緊要係入波就得。3位玩家就諗咗啲花式，唔使華麗轉身都一樣有型有款！

車身窩利台型十足，只要好好控制力度同角度，波話入就入！

BALL ROOM
地址：觀塘興業街14號永興工業大廈12樓C1室
營業時間：12:00nn-12:00mn
費用：$35/小時（人頭費），包場內其他遊樂設施如美式桌球、桌上冰壺、board games等等。Poolsoccer另外收費，$100/小時，不限人數
查詢及預約：5405 4594

內容延讀：

＞做運動梗係要有波鞋，睇下呢10對啱唔啱你心水

＞學埋波鞋街術語就唔怕買鞋會被人呃