熊本熊部長 猛熊過江
好消息！熊本熊已經嚟咗尖沙咀The ONE，舉辦全港首個以佢為主題嘅大型裝置展覽。佢好有禮貌好識做，帶埋熊本縣著名特產靚水果同大家過復活節，場內當然重有Pop-up Store，搶呀！
text – Jessie photo – Pakco
4月4日派茄
熊本熊外形萌爆，但原來佢係熊本縣營業部長兼幸福部長，肩負推廣熊本縣嘅重任，所以今次展覽順理成章都以熊本縣為主題。
上到商場中庭，你就會見到高3米、闊8米嘅巨型熊本熊頭，以及日本3大名城之一嘅熊本城。場內有多個1:1嘅立體熊本熊俾你影相，另外Pop-up Store設計成「熊本縣城市列車」嘅車頭，後面車卡都有幾個影相位。成個布置以櫻花季節為主題，極有春天氣息。商場嘅露天廣場亦會布置成熊本熊小農莊，等大家可以同部長一齊種植熊本縣馳名蔬果，當然只係仿製品嚟。
另外忠粉要留意，4月4日熊本熊會親自主持展覽嘅開幕禮，同大家跳舞之餘，重會即場大派限量版紙扇同靚番茄，重有限定見面會，可以同熊本熊親密selfie，記住嗰日早啲去排隊！
超越Hello Kitty
大家都覺熊本熊好卡娃兒，但知唔知佢點解會出現？原來喺2010年，當大阪至鹿兒島嘅九州新幹線陸續通車時，熊本縣政府意識到佢哋知名度遠遠唔及博多、鹿兒島等鄰近地方，於是就諗計仔，邀請編劇家小山薰堂、插畫師水野學負責規劃1個「熊本驚喜」，發掘出熊本縣優點再作重點推廣，輾轉間就設計出熊本熊作為吉祥物。
熊本熊嘅宣傳小隊極懂得利用網上平台做宣傳，所以呢隻吉祥物亦迅速走紅，行銷公司Character Databank曾喺日本做過調查，顧客對佢嘅好感度同商品購買慾，已超越Hello Kitty同Mickey Mouse兩位舉足輕重嘅大大大前輩，係咪好厲害呢？
肖像權開放使用
自推出以嚟，熊本熊喺日本嘅吉祥物排行榜一直名列前茅。不過佢嘅幕後推手並唔係咩大企業、大公司，只係一班完全冇行銷經驗嘅縣政府級公務員，所以話日本人嘅marketing的確厲害。雖然佢已經好紅，亦幫熊本縣帶嚟好可觀嘅收入，但難得嘅係佢完全冇被有關當局利用嚟「賺到盡」。原來佢嘅肖像權係開放俾大家使用，唔收版稅，條件就係合作嘅商品要有介紹熊本縣嘅資料或者插圖，又或者產品要用熊本縣出產嘅原材料。佢誕生至今嘅初衷一直都冇變到，就係用嚟宣傳佢嘅出生地──熊本縣。
「The ONE×Kumamoto樂遊熊本縣」
日期：即日至5月3日
時間：10:00am-10:00pm
地點：The ONE UG2 中庭及露天廣場
費用：免費
查詢：3106 3640
「Kumamon限定見面會」
日期：4月4日
時間：3:15pm-5:00pm（The ONE UG2中庭）、4:15pm-4:45pm（The ONE露天廣場）
名額：30個（每場）
費用：免費（當日12:00nn喺中庭派發入場證，派完即止。）
紅黑紅紅黑精品
如果我係熊本熊忠粉，去展覽齋睇冇得買紀念品就唔爽囉！今次商場展覽都會設有大型Pop-up Store，一次過集齊多款精品，等大家可以瘋狂「鳩嗚」。
「Kumamon期間限定精品店」
日期：即日至5月3日
時間：6:00pm-10:00pm（星期一至五）、12:00nn-10:00pm（星期六、日及公眾假期）
延伸內容：
香港有甚麼地方適合與閨密、情侶，一大班朋友去？
與閨密、情侶約會的話，當然要選擇氣氛好的地方啦！全港12間必去天台酒吧 都超有feel，傾得興起難免會飲多幾杯，如果出現這些醉酒特徵 時就要適可而止了！返工返到攰，不如一齊去按摩店鬆一鬆，油尖旺按摩店 非常多，實有一間啱你。一大班朋想熱熱鬧鬧，燒嘢食最好不過了，即刻熟讀BBQ技巧7式 ，包你喺燒烤場上戰無不勝！
家居清潔有甚麼好方法？
家居清潔非常重要，做不好隨時影響健康！很多人因為床褥體積大不容易洗滌，而忽略了床褥清潔，即睇5招床褥清潔方法；冷氣機內外都容易累積大量灰塵，洗冷氣機方法好簡單，輕鬆洗走灰塵黴菌。當然做足家居清潔都不能避免曱甴入屋，10種有效消滅曱甴攻略幫到你！
