為何天生不是女生？

呢個標題並非想挑起性別之間的鬥爭，亦非要令更多男士們葡萄。無論你係男生或女生，跑手或打氣觀眾，只要你4月4日有出席NIKE Women’s 10K Hong Kong，1個全港第1個女生專屬的10公里跑步比賽，1個集合3,000名女生的夜跑嘉年華，你都一定由心對這班運動女生感到敬佩同驕傲。

每位女生運動同跑步都一定有自己嘅原因：有人可能為keep fit減肥，有人為咗陪朋友，有人為咗挑戰自己、有人跑步因為可以減壓、有人為健康、有人為自己愛人而跑，有人為自己而戰⋯⋯無論你為咩而跑，當晚3,000個女生就只為同一個目標，一齊向住同一個終點而努力。

10公里唔係好難，但絕對唔係容易嘅事。對於新手跑手，想唔練習就比賽，咁都好衝動。所以身邊好多新手少女都係8星期前開始訓練，由一開頭1至3公里，第2日已經肌肉酸痛，到慢慢可以一口氣完成5公里，到4月4日靠自己努力完成晒10公里，相信除咗你自己，冇人明白你當中嘅汗水同努力！對於跑步好手而言，10公里都唔係易過食豆腐，跑步人就係咁，跑到一定距離當然想挑戰自己，造好個時間。除咗常規跑步訓練，當中亦需要加入體能訓練、LSD、Interval訓練等等，為嘅都係想突破自己，以更好狀態同時間去完成比賽。無論你係跑步新手定好手，係練習途中，你一定有一刻會反問自己：「點解我要令自己咁辛苦？」甚至想放棄。但我諗喺完成比賽，衝過終點線嘅一刻，你會為自己一直嘅堅持同努力而感動。

喺比賽當日，冇人計較彼此時間，唔需要理會身邊跑手係快定慢，因為一幕幕嘅情境都令我更加肯定在場3,000名女生都係為自己而跑，為自己嘅努力作出肯定。

由起點線出現Go Girls一刻，3,000名女生紛紛為挑戰自己嘅旅程踏出重要嘅一步。

你可能會埋怨點解跑咗咁耐都係得3公里，但你身邊每位女生都係一齊作戰嘅同伴。

最後1公里到200米到衝過終點線一刻，身邊有無數人為你吶喊，對你而言都應該好模糊，因為你腦海中應該充滿對自己嘅驕傲同感動。

完成比賽後，女生之間互相給予一個肯定嘅擁抱，冇人理會身上有幾多汗水，大家只會在意彼此一齊訓練嘅努力同互相給予嘅支持。

比賽後得到嘅頸鏈，應該係世上女生給予自己最好嘅禮物，1份由自己努力同堅持而得到嘅鼓勵，並非可以用金錢去衡量。

女生們完成10公里後都拍下無數照片，佢哋都係為自己嘅努力拍下紀錄，實屬人之常情。又或者身上貼上不同tattoos，讓自己閃耀全場，亦並無不妥，女生嘛！但我睇到更重要嘅係場內充滿無數勇敢、樂於挑戰自己、堅持嘅運動女生，我衷心為每位而感到驕傲。呢晚，運動女生唔止加10分，每位都應該替自己加1萬分！而呢一晚亦唔應該係我哋嘅終點，運動女生，繼續為自己而跑而努力同堅持吧！

T.LUM

1個鍾意做運動嘅女生。做運動好簡單，只要鍾意嘅、喜歡嘅、想試想做嘅，就可以行動。