潮星髮型Ver 2.0 實有款你跟過
廣告
上次同大家概括咗70s至今嘅髮型類別反應唔錯，睇嚟大家都好着緊個頭，或者同人嘅接受能力有關，愈近代髮型種類就愈多，單單呢十年八年就已經有唔同風格嘅潮頭出現，假設你或者你friends唔係獨孤一味skinhead，再睇番呢十年嚟嘅相，我敢講你（哋）最少改變過不下於3次髮型，以下落嚟再為大家介紹更多近期潮星所帶嚟嘅hit爆潮流髮型，你實有跟過！
Text – Jer
1. Skinhead
對於我嚟講，skinhead就好似苦瓜咁，細細個阿媽迫我隡我真係好唔鍾意，但大個咗我明白skinhead嗰種簡單不羈加方便隨意先係真正男人嘅浪漫，可惜我個頭型真係carry唔到。
2. 壞孩子的天空
其實我真唔識稱呼呢種髮型，尤記得陳冠希初出道時最hit，呢個壞孩子形像令到當時街上個個男生都將個頭摷到好亂（但其實用咗超過30分鐘去摷），都可以稱為一代潮頭。
3.前蔭頭
除咗韓仔之外，能夠忍受2、3cm厚頭髮嘅重有N年前嘅Justin Bieber，而其實我覺得佢喺呢個界別最有代表性，好希望佢而家可以梳番（唔會拮住對眼嗎？）。
4. All Back
潮流嘅嘢真係好奇怪，我好記得10年前《衝上雲霄》阿Sam哥梳果陣個個都話核突，但近幾年一落到街幾乎個個男仔都整個all back頭。講真！我有時唔想諗model整咩頭都會叫make up幫佢梳all back，好似黑色一樣百搭又唔會出事。
5. 中間分界
以前中間分界即係心理變態，但冇人會覺得G-Dragon係心理變態，所以佢一整個中間分界，潮人即跟。
6. 滄桑型
正如我為佢起嘅名一樣，留得呢種髮型幾本上係充滿歷練、看破紅塵或根本唔在意別人嘅眼光，呢種髮型唔係話留就留，本身有故仔有經歷嘅人自然會有，唔好勉強。
7. Man Bun
可能明星實在太忙冇咩時間打理頭髮（連隡skinhead都冇時間），近年愈嚟愈多人流長頭髮扎辮，英文叫Man Bun，其實即係武士頭，流埋鬚真心man。
