最強大媽 金喜善 崔智友
廣告
面對歲月無情，加上韓女個個來勢洶洶，令金喜善同崔智友呢兩位昔日嘅女神，近年事業停滯不前……又好在女神識得諗兼放得開，1個唔介意着超短裙喺新劇做不良學生妹，另1個唔介意跟住幾位阿伯遊埠做阿四，負責擔擔抬抬。嗱！咁咪得咗囉！金喜善新劇《Angry Mom》收視持續向上，而崔智友嘅《花樣爺爺——希臘篇》首播當晚成為綜藝節目之冠，大媽威力唔講得笑。
text-Phoebe
連仆兩劇即轉軚
睇睇資料，《天國的階梯》都講緊係12年前嘅貨仔，當時憑該劇爆紅嘅崔智友好明顯已經唔再係青春少艾，前年接拍由日劇《家政婦女王》改編嘅《奇怪的保姆》，一心諗住好似日版女主角松嶋菜菜子咁再創高峰，結果《奇》因為悶場太多，加上劇本極度混亂，令該劇劣評如潮；去年，崔智友夥拍權相佑出演《誘惑》，諗住呢個經典組合實冇死，結果全劇平均收8.9%，現實就是如此殘酷。
絕世好機會
既然拍劇唔掂，倒不如由綜藝節目入手，去年崔智友以嘉賓身分出演收費電視tvN嘅《1日3餐》，由洗碗、煮飯到醃泡菜都頭頭是道，觀眾睇得開心，收視亦都順心，節目製作人羅目英錫順勢邀請崔智友出演新一輯《花漾爺爺》。
《花漾》至今已經拍到第3季，證明有一定吸引力，加上出演嘅李瑞鎮因為照顧得幾位老人家貼貼服服而被封為「新一代好男人」，先天條件好到咁，崔智友有唔拍嘅理由嗎？結果咪得咗，最重要係（昔日）女神要放得開。
爆粗阿媽勁揪得
同樣係姐級嘅金喜善，07年結婚生女，12年以《信義》作為復出之作，同敏鎬大玩姐弟戀，結果被指老牛吃嫩草，連帶收視亦受到影響。去年善姐接拍長篇週末劇《真是好時節》，一改過往優雅玉女角色，喺劇中做惡死收數女，突破性演出，加上幕後班底夠強，令《真》收視持續向好。或者係惡開有條路，善姐喺新劇《憤怒的媽媽》中，繼續動爆又郁手，而為咗搵出校園欺凌真兇，竟然做超齡學生妹，不過或者係韓國觀眾對校服look或以校園為題材嘅劇集都情有獨鍾，故《憤》開播以來收視持續上升，又得咗！
