《New Monday》跑步影像企劃 RUN2CONNECT「失明篇」~前

2009年年中，梁小偉（Gary）因視網膜色素病變，漸漸失去視力，由五光十色嘅世界，瞬間去到漆黑一片嘅境地。病變令Gary霎時間變得無所適從，眼前嘅風光逐漸失去，彷彿就連人生都即將失去。病變雖然奪去Gary眼前嘅光明，但冇剝奪佢選擇前路嘅權利。因為全失明人士嘅一番話，喚醒Gary頹廢已久嘅身心，令佢踏上長路漫漫嘅跑途，以跑步印證自己「得到」比「失去」更多。
「前」，代表Gary不斷向前嘅決心、未來道路嘅方向、自己步伐嘅去向。縱使，Gary失去望到前路嘅機會，卻可憑身心感受到屬於自己嘅光明前路。

text – yiplingling photo – Mike W.

他 漆黑中
視網膜色素病變，1種遺傳性眼科疾病，初期普遍嘅病徵係夜盲、視野變窄等，最壞嘅情況會變成完全失去視力，Gary就係其中之一。Gary自小就得知自己患上視網膜色素病變，由2000年開始視力慢慢收窄，2009年年尾更失去視力，由柔弱嘅光線變成一無所有，眼前嘅一切瞬間即逝。眼前漆黑一片嘅感覺令Gary變得不知所措，腦內一片空白，無助感隨即湧現，人生變得毫無目標、希望，更莫論遙遠嘅將來。Gary選擇以自暴自棄嘅形式過活，以酒精麻醉自己，試圖逃避已經失明嘅事實，然而，酒精及頹廢嘅生活對於繼續生存並冇太大幫助。直到某日，1位陌生人，一番讓人反思嘅說話，令Gary當頭棒喝，命運亦隨之改寫。

Profile
梁小偉（Gary） 48歲
視網膜色素病變病患者，自小患有夜盲症，直到2009年尾開始完全失明；躲於家中頹廢近11個多月，最後在社工引領下重拾鬥志，加入香港盲人體育總會，於跑道上尋回人生目標。

內容延讀

＞一次過睇晒所4個跑步故事

他 光明處
頹廢乏味嘅日子一直維持11個月，Gary嘅體重亦由140多磅變成180多磅，身體變得虛弱且多病痛。機緣巧合下，1次視障人士嘅探訪中，1個陌生人嚟到Gary面前。「你已經比好多人都幸運，至少你曾經見過呢個世界。我，天生失明，不過我冇放棄過自己，我讀書、工作、結婚、做爸爸，我一樣可以好開心，睇唔到嘢，有睇唔到嘢嘅幸福。」短短嘅說話勝過千言萬語，一盆冷水突然間將Gary淋醒，佢開始懂得反思、醒覺，回想起11個月嘅坎坷生活，決心要令自己重回正常軌道，尋回屬於自己嘅人生旅途。Gary開始與外界接軌，好似初生嬰兒一樣，重新學習如何生活。隨後，更加入盲人體育總會，開始學習跑步，好好鍛煉自己，踏上無盡嘅跑途。

他 無盡跑途
跑步，對於視障人士絕不輕易，皆因佢哋無法看到前路，所以伴隨身邊嘅領跑員就非常重要。領跑員，充當視障人士嘅1雙眼睛，帶領佢哋遠離險阻，順利跑過每1步，完成每段跑途。李宏俊（Marco）係Gary嘅領跑員，2人嘅情誼、信任及默契建基於密集嘅運動場訓練，再跑到街上，最後一齊參加比賽。「信任係好重要！1條繩維繫2個人，讓彼此擁有共同嘅目標，獎項已經唔再重要，最重要係可以一齊喺跑道上奔馳。為咗報答領跑員無私嘅付出，我會用盡全力去完成每場比賽。」雖然作為領跑員嘅Marco並冇任何獎項、獎勵，純粹係無條件嘅付出，但對於Marco，呢個係使命，更讓自己明白到眼前嘅一切唔係必然。「Gary係個唔會放棄嘅人，佢嘅經歷影響到好多人，而我嘅角色就係盡量襯托佢，俾大家見到佢身上嘅光芒。」1條繩，2個人，

1條心。「我好多謝所有領跑員，多謝Marco。冇領跑員就無視障運動員，冇你，就冇我」。

他 人生觀
夢想，於漆黑裏仍然鏗鏘。「失去視力，不代表失去一切，但放棄自己，就會失去一切。所以，我唔會放棄自己，只要我重跑得，我都會繼續堅持！」Gary形容自己嘅前半生唔懂得珍惜，反而後半生失去視力，令佢學懂珍惜身邊嘅人與事。「人，唔會永遠站喺最好嘅位置，同行山一樣，有高有低，先會品嘗到當中嘅甜與苦。我可以繼續比賽、繼續跑步，已經心滿意足。」人，無論遇上高低起跌，向前走都係必定嘅事，Gary雖然失去視力，但認為自己同大家一樣都係個普通人，參與馬拉松嘅時候都跟其他跑者一樣，跑足42.195公里，冇多冇少。

「我可以用耳、用鼻、用手去感受生活，用另1個角度去『看見』世界。」同時，Gary亦用雙腳為自己跑出更清晰、光明嘅前路，一切只因：「我好鍾意跑步！」

內容延讀

＞一次過睇晒所4個跑步故事

＞【王麗雅】1場讓人捨不得跑完的馬拉松