【假日拍拖新節目！】放飛機放Q版 囡囡都愛玩

你女友可能會投訴：「呢啲嘢男仔玩喎！」以前可能係，但遙控飛機發燒友阿志從台灣Q版遙控飛機攞靈感而自行研發出Q版747同F16後，呢樣講法要改寫，因為呢種遙控機外形可愛，就算囡囡都一樣愛，絕對係假日拍拖嘅最佳節目啦！

text – Jessie photo – Tung、由被訪者提供

拆晒引掣先飛到

阿志玩咗遙控飛機超過10年，係資深發燒友，佢舊年年頭睇到台灣有人玩Q版遙控飛機嘅video，就上網搵資料，發現原來台灣勁hit玩Q版。「有台灣『飛友』將Q版飛機嘅製作方法擺上網，細節details就要自己研究，但唔算難，我第1部波音747整咗1個月，喺4、5月試飛再微調，最初我根據真正747咁裝晒4個引擎上機翼，但飛唔到囉！最後拆晒先試飛成功。」
阿志話最初試飛成日撞，造一隻遙控飛機有好多細節。「舵角角度、裝咩摩打、摩打斜度、前轆轉嘅角度等等都要好準確。要造部飛得上天嘅遙控飛機唔難，但要飛得好就好難，去到上年7月先捉到個竅門。」

自娛變生意

遙控飛機喺台灣一直勁hit，所以10年前阿志剛接觸遙控飛機時，亦有上台灣討論區「學嘢」。「台灣人玩得好專業，佢哋嘅自製飛機都好靚，我見到就開始message佢哋請教，問佢哋可唔可以整部D.I.Y.飛機寄過嚟香港？佢哋又竟然肯喎！於是就買咗部F-18返嚟研究自製方法，咁就開始D.I.Y.飛機！」
阿志D.I.Y. Q版遙控飛機一開始時係自娛，不過佢每次攞部機出去放時，就勁多人問佢喺邊度買。「部Q版機好受飛友歡迎，我當時就有個諗法，就係幫其他唔會D.I.Y.嘅人造Q版飛機，一齊玩會更開心，所以就開始整網頁同放上拍賣網站俾人登記訂造。今年更受邀將會到1間學院開班，教人自製Q版機。」

 
內容延讀：

＞除咗玩遙控飛機，7月可以去埋Emax澳洲彈床樂園

＞睇埋同樣好打耳嘅MINIONS單挑浪花兄弟

＞重有DISNEY打耳爆夏日兩大必搶之物

Q版F16戰鬥機
（售$600-$1,300，視乎咩裝備組合而定）
翼長：59cm
機長：69cm
機輪：有
飛行重量：空機全重約340g，連電池約450g
飛行時間：約5至7分鐘（視乎油門控制習慣而定）

Q版波音747客機
（售$800-$1,500，視乎係咩裝備組合而定）
翼長：73cm（可拆翼）
機長：73cm
機輪：有，加有拉線補強
夜行燈：有
飛行重量： 空機全重約400g，連電池約500g
飛行時間： 約5至7分鐘（視乎油門控制習慣而定）

上網訂Q版機

阿志教操「機」

心思思想買Q版機又驚唔識玩？阿志話訂咗之後如果唔識飛，歡迎call佢一齊飛。佢而家先俾貼士各位初學者先：
1. 買機後check清楚飛機每個會郁嘅部位係咪可以遙控自如。
2. 可先擺佢喺地下行下先，再加速，等自己feel下部機大概加速會係點。

3. 盡量喺空曠地方試飛，唔好喺窄地方試，因好易撞。
4. 初學者可搵較資深嘅飛友一齊玩，將兩個遙控用「教練線」駁住，即係教練隨時可以take control，適當時機又可以俾你控制練下嘢。
5. 大風就唔好飛住喇，喺微風環境下試飛就最好。乜嘢叫做大風？如果喺地面小腿都感到有風，咁喺上空就會更大風，會好難控制。

 
內容延讀：

＞除咗玩遙控飛機，7月可以去埋Emax澳洲彈床樂園

＞睇埋同樣好打耳嘅MINIONS單挑浪花兄弟

＞重有DISNEY打耳爆夏日兩大必搶之物

先操模擬器

阿志話Q版遙控機最大分別，係Q版機size比一般遙控機大，如果一大風就好難玩。「因為Q版size脹啲，較阻風，我都唔建議大風時飛。另外Q版機較易爛，我建議初學者玩Q版機前，先學好基本飛行知識，可以先喺電腦用模擬器玩到熟咗先，尤其係練點樣俾油起飛同埋降落嘅動作。即係好似打機咁；可將遙控連接電腦，再喺電腦裝『Real Fight』、『Phoenix』等軟件，像真度都有7、8成。」
阿志話，遙控飛機同遙控船、遙控車，甚至航拍機都好唔同。「嗰啲就算玩家放開晒手唔控制個遙控，船同車都會停喺度，唔會有咩意外。遙控飛機就一定要全神貫注望住佢，因為你遲疑咗2、3秒，就可能會撞到嘢或者唔知佢飛咗去邊。Q版遙控飛機用珍珠板製成，硬度一般，唔受得撞擊，所以真係要操到熟先好玩！」

 
內容延讀：

＞除咗玩遙控飛機，7月可以去埋Emax澳洲彈床樂園

＞睇埋同樣好打耳嘅MINIONS單挑浪花兄弟

＞重有DISNEY打耳爆夏日兩大必搶之物

遙控器解構
遙控器有平有貴，由4個channels到10個channels都有，每個channel就控制1樣嘢。玩Q版遙控飛機最少用4個channels（約$200-$300），如果加埋夜航燈同陀螺儀（喺天空可即時作出反應，修正番部機嘅裝置），就要用到6個channels。如4個channels主要控制：

1. 用嚟控制副翼，即係大機翼後方可郁動部分，係用嚟控制飛機向左或右。
2. 控制升降舵，即係小機翼後方可郁動部分，用嚟控制飛高或低。
3. 前輪嘅轉向，用嚟幫助起飛，同埋降落喺地面滑行。
4. 控制摩打，即係油門、動力，控制快慢變速。

熱飛地方要少屋
要玩Q版遙控飛機，起碼要有2、30米長嘅平坦直道可作起飛之用。如果係對翼較細嘅F16戰機機款，就要3、40米。另外天空要夠空曠，飛咗上天之後，可以有好多位可以俾部機飛，所以要少屋同樹，又唔會點嘈到民居，視野廣闊嘅地方就最理想。以下係幾個係遙控飛機飛行熱點：

樟樹灘
咪表停車場位置有長而平嘅直路，係好理想嘅起飛、降落地點。

南生圍
空地夠大，但因為係草地，所以較適合玩手擲遙控飛機、大轆飛機、直升機，細轆就好易會被草纏住而整爛。

沙田富山
有個山坡好適合玩手擲飛機，而車路位置就可以俾遙控飛機起飛，所以兩種都玩到。

將軍澳
行人路冇乜人會行，唔會影響到人，所以手擲同埋喺地上起飛嘅遙控機都適合喺度玩。

 
內容延讀：

＞除咗玩遙控飛機，7月可以去埋Emax澳洲彈床樂園

＞睇埋同樣好打耳嘅MINIONS單挑浪花兄弟

＞重有DISNEY打耳爆夏日兩大必搶之物