後生女都要學定先！4大凍齡美魔女keep fit保養秘密

text-Emily（ig：emkiuuuuuuuu）photo-網上圖片

1.羅霖 按胸防下垂

身為3子之母嘅羅霖，絕對係美魔女之中嘅美魔女。雖然接近50歲先出噴血寫真，但一啲都唔趕客，剩係睇佢又滑又挺嘅胸部，已經砌贏晒書展啲o靚模。

為咗keep住胸部線條，羅霖每晚都會自己按摩胸部，同埋做加強胸部結實嘅運動。佢每次沖完涼都會全身搽body lotion，重會每月定期做2至3次人手推脂通淋巴，保持住完美嘅身形。

2. 周海媚　「肌斷食」護膚

48歲喺周海媚喺《武媚娘》(武則天)入面驚現「西瓜胸」，加上佢又白又滑嘅皮膚，靚到小編爭啲窒息，范爺都要行埋一二邊！

或者真係天生麗質，周海媚嘅護膚方法居然係搽得愈少愈好。面膜好耐先敷1次，有時洗完面就咁搽爽膚水就去瞓。專家話呢招叫「肌斷食」，因為肌膚本身有有自我修復力，定時減少用護膚品，反而可以刺激肌膚運作，令膚況更加穩定咁話。而家天氣咁濕，真係可以試吓喎！

內容延讀

＞一樣keep得咁好！5大星級辣媽產後瘦身秘訣

＞要保養，洗面最重要！睇吓邊隻洗面膏好用

3.周慧敏　唔曬太陽

雖然不嬲都覺得周慧敏keep得好，但早排睇完《大時代》，更加認真地懷疑，究竟佢係咪食咗防腐劑？廿幾年前做慳妹嘅佢，同而家47歲嘅佢，幾乎係冇！分！別！

原來女神真係唔食人間煙火，周慧敏自從26歲開始就冇曬過太陽，有太陽嘅地方一定擔遮。紫外線的確會加速皮膚老化，女神有樣重有智慧！至於減肥方面，佢堅持每餐只係8成飽，最鍾意食低膽固醇嘅魚肉。

4.鍾楚紅　調節食量

講到美魔女，點可以唔提紅姑？55歲喇，次次行出嚟都重係靚到「叮」一聲，佢話保持年輕秘訣係笑多啲，聽講紅姑好鍾意周圍搵好嘢食，食埋食埋咁多，點解重可以咁fit？

原來佢有自己一套食嘢方式，就係今餐食得豐富，下餐一定要食得少同清淡。除咗控制飲食，重好講究養生，飲多啲水係指定動作，揀食物都偏向健康、天然同organic食品，佢亦好注意做運動，游水、yoga呢啲走唔甩，得閒重會去行山。不過佢話佢多數天未光就出發，想捕獲佢就要早啲起身喇！

內容延讀

＞一樣keep得咁好！5大星級辣媽產後瘦身秘訣

＞要保養，洗面最重要！睇吓邊隻洗面膏好用