密實姑娘綾瀨遙

自從登上國民級演員之後，綾瀨遙近年已經唔再玩性感，不過，為咗慶祝女人30，加上催谷下同長澤正美套新戲《海街diary》，驕人身材終於重見天日。不過由於寫真《Sea Stories》sell嘅係大自然，所以藍天碧海、素顏照有唔少，性感相呢部分呢⋯⋯數埋都有10張嘅，同女神過往嘅寫真有天同地嘅距離，喺日本首週銷售4千本都唔夠。寫真唔賣肉，走去賣藍天碧海，粉絲打開電視睇國家地理頻度都得啦！女神都一樣冇情講。

text-Phoebe

今非昔比

綾瀨遙去年推出寫真《Momento》，由於係2字頭最後1本寫真，大條道理露露露，水着、晚裝雙管齊下，真係睇到宅男們係咁攞紙巾⋯⋯抹汗㗎！既有天使面孔，又有魔鬼身材，早已有國民女神之稱嘅遙妹，去年因為日劇《今天不上班》而人氣再度攀升，再次當選最理想情人，做得理想情人，無理由再任意打大心口俾人睇！所以半年後，當遙妹推出寫真集《Sea Stories》時，三點式同內衣1件起2件止，最火滾應該係一件頭泳衣，宅男話之你遠赴意大利西西里取景啦！睇完肯定嬲豬豬上網鬧爆！

無肉無銷量

雖則話30歲，但點睇遙妹都冇中女嘅感覺，喺寫真中，有唔少白色、杏色冷衫，卻完全刺激唔到眼球，不過勝在有佢最拿手嘅無辜眼神，以及唔造作笑容，就算素顏上陣，都唔失禮。之不過，當寫真有一半都係呢類打扮⋯⋯就真係神仙都難救（銷量）。加上未有做太多宣傳，結果日本預售900幾本，首週銷售連4千都冇，同期推出寫真嘅AKB48成員小鳩陽菜講緊係5萬，遙妹都輸得幾難睇。

新戲出戰康城

不過話口未完，為谷新戲《海街diary》，遙妹準備喺5月中又出多本寫真喇！不過，大家唔好有期望，我諗都係劇照大雜燴，唔會有⋯⋯講番呢套改編銷售量達250萬本嘅同名漫畫電影，由《誰調換了我的父親》嘅是枝裕和執導，故事講述喺古城鐮倉居住嘅三姊妹（綾瀨遙、長澤雅美、夏帆），某日突然有個自稱係同父異母嘅細妹（廣瀨鈴）搵上門，並要求一齊生活。電影6月先喺日本上映，但製作公司日前就落實《海》將會參加第68屆康城國際電影節，喺競賽部分角逐最高榮譽「金棕櫚」獎，有氣勢喎！

內容延讀：