吉卜力時代店嚴選必買精品

日本動畫大師宮崎駿同高畑勳創立咗世界聞名嘅「吉卜力工作室」炮製無數經典動畫，之後又開設官方精品專門店「橡子共和國」，賣動畫角色精品。

喺13年6月，尖沙咀海港城開設首間日本以外嘅「橡子共和國」分店，兩年後嘅今日再喺銅鑼灣時代廣場開設海外第2間分店。為隆重其事，吉卜力商品企劃部部長今井知己同經營「橡子共和國」嘅BENELIC CO., Limited董事長安藤一郎亦齊齊嚟到時代廣場店巡視。我哋搵咗佢哋做專訪外，重會幫大家嚴選店內嘅必買精品，因為全店有成700幾款，要揀真係有排揀呀！

text-Jessie photo-Hin

https://www.youtube.com/watch?v=6dY1leRDWJc

安藤一郎

港店銷情贏日本

「橡子共和國」喺日本本土已經有40幾間分店。負責經營嘅公司BENELIC CO., Limited董事長安藤一郎話，佢早就計劃喺香港開3間分店﹕「2年前喺香港開第1間時，已計劃要喺香港開3間分店，但當時實在唔太了解香港經營情況，穩陣啲就逐步嚟囉。我真係估唔到尖沙咀店銷情咁好，重贏咗唔少日本店！同全日本專門店比，尖沙咀分店生意額竟然排到第2位！咁我哋當然好有信心喺香港開第2間分店啦。」

安藤重話，佢哋店內產品一向主打龍貓，所以時代廣場店開鋪時，一定要有巨型龍貓同貓巴士公仔企喺門口招呼客人。「上年尖沙咀店曾經試過轉過擺《魔女宅急便》巨型裝置，遲啲銅鑼灣店都可能會咁做，重喺計劃中。」

內容延讀：

密實姑娘綾瀨遙

下調售價益粉絲

安藤先生話好希望可以提供到同日本一樣質素嘅產品俾粉絲。「其實喺香港開店前，已知香港亦有好多吉卜力狂熱粉絲，所以好想做好香港分店報答佢哋。尤其喺價格方面，我哋都一直做到盡量同日本一樣，唔想令大家覺得喺香港買我哋嘅精品會貴啲。最近日圓跌咗，貨品嘅售價都會跟住下調。」安藤先生重預告7月中，會喺香港推出限定嘅新系列產品，包括衫、飾物、雜貨，忠粉們要留意住喇！

今井知己

最受歡迎幸運石

時代廣場店入面有成700幾款精品，其實喺眾多精品入面，邊款最受歡迎呢？吉卜力商品企劃部部長今井知己就話，喺而家買得到嘅商品中，隨機抽嘅小龍貓幸運石頭係佢哋銷售嘅no.1，一共有8款。「喺日本同香港，幸運石頭都係銷售第1嘅產品。我哋基本上唔會定立每年有咩主題嘅產品要推出，都係睇下supplier諗到咩新products出嚟，我哋就盡量將品質搞好再生產。對比起不斷諗新產品，吉卜力更着重貨品嘅設計同質量。就好似店內有啲龍貓杯碟款式已經推出咗23年，毛公仔亦有由1989年推出到而家重賣緊嘅款式。未來設計新商品都會考慮加入香港特色元素，但暫時未諗到。」

內容延讀：