一定無鉛！5款女星都敷嘅 DIY美白面膜

text-Emily（ig：emkiuuuuuuuu）photo-網上圖片

無鉛 DIY美白面膜

1. Emma Watson 木瓜蜜糖面膜

美貌與智慧並重嘅妙麗，雖然天生一副美人胚子，但美人唔keep都會老，所以佢都好注意護膚。妙麗曾經透露自己係木瓜控，最鍾意用木瓜溝蜜糖嚟去角質、美白，唔怪得啲皮膚咁鬼靚。

木瓜蜜糖面膜

材料：木瓜半個、蜜糖1茶匙

做法：將木瓜舂爛，加入蜜糖，撈勻後敷上面15分鐘，再用水洗乾淨。

功效：木瓜含有豐富嘅維他命C同埋木瓜酵素，可以促進新陳代謝，溶解老化角質層，令到皮膚更加白淨、有光澤。

2.范冰冰　蘋果泥面膜

不嬲都覺得范爺唔係地球人，啲五官精緻都離晒譜都算，皮膚白到反晒光先得人驚，難怪好多女人都視佢為美容嘅終極目標。咪話小編唔益你，原來范爺經常會用蘋果嚟敷面，美白兼且可以抗氧化，即學！

蘋果泥面膜

材料：雞蛋1個、蘋果半個、橄欖油1茶匙、麵粉5g、蜜糖2茶匙

做法：將蘋果去皮切粒，舂爛佢。然後加入蛋白、麵粉、蜜糖同橄欖油，攪勻直到變成糊狀。敷上面大概10至15分鐘，再用水洗乾淨。

功效：蘋果含有豐富嘅有機酸，可以促進新陳代謝、改善膚質，另外亦都有美白同抗氧化嘅作用。

內容延讀：

＞必Follow嘅4位IG 扮靚達人，減肥瘦身、彩妝、編髮乜都有！

＞睇韓劇學唇妝，女主角唇色大公開！

3.徐若瑄 中藥美白面膜

講到童顏女神，徐若瑄係絕對數一數二。已經40歲，重要陀緊BB，塊面都重係又白又尖。佢平時會用中藥自製美白瘦面面膜，塊面有Baby fat嘅朋友不坊試吓。

中藥美白面膜

材料：薏仁、荷葉、烏龍茶、海藻

做法：將薏仁、荷葉、烏龍茶、海藻舂爛變成泥，直接搽上面，等20-30分鐘之後洗乾淨。

好處：有緊致皮膚嘅功效，可以提升皮膚光滑度同彈性，美白同時瘦面。

4.林志玲 黃瓜牛奶面膜

雖然暗黑版林志玲好似重紅過林志玲本尊，但你唔好理，人哋就快40歲，啲皮膚都重白滑過你多多聲。本來已經係美容達人嘅佢，曾經教過人用黃瓜牛奶做面膜，因為性質好溫和，連敏感肌膚都可以盡情敷。

黃瓜牛奶面膜

材料：小黃瓜1-2條，全脂牛奶30ml

方法：將小黃瓜搾成汁，加入牛奶，然後攪勻。沾濕面膜紙或者化妝棉，撻上面敷20分鐘，記得最後要用溫水洗。

功效：美白保濕，同埋有抗炎鎮靜嘅功效，敏感肌膚最啱，輕微灼傷都可以用佢嚟纾緩。

5.宋慧喬　蛋白蜜糖面膜

次次喺電視見到Laneige嘅廣告，都會忍唔住停喺到睇，因為宋慧喬實在太靚。雖則拍廣告實打晒燈，但係人都知佢啲皮膚本身已經係零瑕疵，白之餘重好有光澤。聽聞佢皮膚咁靚嘅秘訣，就係keep住用雞蛋同蜜糖自製美白面膜，兩樣食物都咁有營養，未敷已經覺得work！

蛋白蜜糖面膜

材料：雞蛋 1隻（淨係要蛋白）、蜜糖1湯匙

做法：將蛋白同蜂蜜攪勻，喺夜晚就嚟瞓嘅時間搽上面，等佢乾咗之後，用水洗乾淨，1星期敷兩次。

功效：除咗美白，重可以能收縮毛孔同去皺。

內容延讀：

＞必Follow嘅4位IG 扮靚達人，減肥瘦身、彩妝、編髮乜都有！

＞睇韓劇學唇妝，女主角唇色大公開！