【Dining娜】辣妹的浪漫 x 進擊的辛蟹
廣告
同朋友出街食飯食得多，有時放工都想hea喺屋企煲劇攤抖下。咁啱嗰日行過超級市場見到合味道出咗2隻新口味：辣椒蟹味同黑胡椒蟹味，可能我鬼妹仔性格啦，立即就邀請呢2個來自新加坡嘅「朋友」返屋企，陪我一齊煲進擊的巨人，跟番上潮流嘅尖端。
講起合味道其實都幾霸氣，世界上第1款杯麵，年紀仲大過我呀爺。一直都鍾情於合味道海鮮系列，佢哋陪我度過無數考試、打風、通頂煲劇與寂寞嘅日子。所以點都要試下新出嘅辣椒蟹味同黑胡椒蟹味，再同大家開心些牙啦！
辣椒蟹味望落就多蔥、栗米、蟹柳同埋聞落有少少酸酸地嘅味，應該都幾開胃。而黑胡椒蟹味一開就已經聞到一陣刺激嘅胡椒味，配料有蛋、蟹柳，仲有眼望都見到好多黑胡椒。
唔知大家點樣煮杯麵，我分享一個完美杯麵煮法，加熱水去到水線位，搣走成個杯麵蓋，擺入微波爐加熱1分鐘45秒。登登登凳… …完美嘅杯麵就此誕生。
終於有得食，黑胡椒蟹味我只可以話個湯底認真好黑胡椒，一叮完成個廚房都係黑椒味。可能係蟹味杯麵，辣得嚟一啲都唔嗆喉，好鬼惹味。配料方面有蟹柳就唔使講啦，最驚喜係有洋蔥，有時辣辣下，有啲洋蔥嘅甜味緩衝下真係好加分。
