食Marvel/DC兩家茶禮荷里活星1人演幾俠

呢期超級英雄片大紅，Marvel陣營有「Civil War」英雄內鬥企劃，而DC Comics亦有「Justice League」正義聯盟盡出旗下超級英雄。兩大陣營涉及超級英雄最少幾十個，睇多10年都未睇得晒。

喺需要大量演員扮英雄但供不應求情況下，有啲生得「四正」嘅星就食盡Marvel同DC兩家茶禮，扮演過唔同嘅超級英雄（有啲係食幾次同1家茶禮）！下面7位演員，如果我唔講，你又知唔知佢哋扮過唔同嘅super heroes？

text-東 photo-網上圖片

1. Ben Affleck（蝙蝙俠/夜魔俠）

呢位荷里活才子捱咗多年，近年嘅《失蹤罪》同《ARGO–救參任務》先令佢吐氣揚眉。佢一口氣簽咗3集做蝙蝠俠（《Batman v Superman》之後有上下集嘅《The Justice League》），預料人氣會再一步上升。

乜話？你未聽過《夜魔俠》（Daredevil，2003年）？唔出奇吖，因為香港人根本唔多識呢個Marvel盲眼英雄，再加上當年賓佬拍呢套戲時身形脹爆，所以環球票房麻麻，佢亦被影評人恥笑佢應該開套「Fattydevil肥魔俠」。好彩賓佬因為拍《夜》媾掂而家嘅靚老婆Jennifer Garner，都叫做冇蝕到入肉。

即睇《Batman v Superman》預告：

2. Aaron Taylor-Johnson （勁揪俠/閃銀）

《復仇者聯盟2》裏面嘅閃銀（Quicksilver）係咪大隻又有型呢？我唔講你又知唔知佢係2010/ 2013兩套《勁揪俠》中嘅主角呢？真係仔大18變！Aaron6歲就下海做童星，絕對係資深演員，憑佢內外兼備，只要加啲運氣，他日一定可以成為荷里活一哥！

內容延讀：

＞型完就睇下可愛到暈嘅迷你兵團MINIONS TIC TAC

3. Chris Evans （美國隊長/《神奇4俠》Human Torch）

Chris Evans飾演正氣嘅美國隊長爆紅，其實佢喺2005/2007嘅兩套《神奇4俠》已經扮演4俠中其一嘅Human Torch，雖然《神》拍咗兩集，而佢亦係主角中最受歡迎嘅一個，但直至做美國隊長，先算真正成為一線演員。

4. Ryan Reynolds（綠燈俠/《X-men origins wolverine》Deadpool/《幽靈刺客3》Hannibal King）

全荷里活扮得最多漫畫英雄嘅，應該係型男Ryan Reynolds，佢喺2011年做過綠燈俠、喺《狼人外傳》做過口多多嘅雙刀客Wade Wilson，後尾被改造為最終大佬Deadpool。2004年又喺《幽靈刺客3》飾演殭屍獵人Hannibal King（《幽》本身係Marvel漫畫）。

但Ryan始終冇乜觀眾緣，到而家都係紅唔起，不過你咪理，靚仔嘅機會係多嘅，佢喺《狼人》內飾演嘅角色Deadpool家下就獨立開戲，重搵返Ryan演，正全力拍攝中，希望佢今次一炮而紅啦。

花邊新聞一則﹕Ryan被譽為荷里活最蠢嘅男人之一，原因係：佢竟然同被譽為全球最索嘅女人「黑寡婦」Scarlett Johansson離婚！

內容延讀：

＞型完就睇下可愛到暈嘅迷你兵團MINIONS TIC TAC

5. 尼古拉斯基治（超人/Ghost Rider）

呢位奧斯卡影帝盛傳因為要還債，近10年拍嘅幾乎都係爛片，包括兩套《幽靈車神》。片中佢扮演着晒火嘅骷髗頭車手，爛就爛咗啲，但我諗點都有印象啩？你又知唔知原來曾幾何時，基治曾喺添布頓執導嘅《Superman Lives》扮演超人，連造型都試埋？不過後嚟套戲胎死腹中。導演Jon Schnepp就拍緊紀錄片《The death of Superman Lives》，講返電影胎死腹中前因後果，睇下基治嘅超人造型，拍得成肯定係史上最cult超人電影，可惜可惜。

睇紀錄片預告