講到最新一定要數出前一丁泡菜鍋味杯麵，呢2日先出街，廣告片重搵嚟日本紅到出汁嘅《妖怪手表》一齊crossover，片中日清仔大跳妖怪操（連木村都跳過㗎！），一邊食碗泡菜鍋味杯麵，辣都佢噴火，個樣燥過《玩轉腦朋友》嘅阿燥！係呀，既然咁hit，我哋編輯部即搵嚟呢期一樣咁hit《玩轉腦朋友》嘅阿燥，試下3大最新泡菜杯麵，睇下邊款辣到噴火指數最高！

text – William

1.農心泡菜杯麵

首先我哋試嘅喺韓國街買到嘅杯麵，不過，見佢外型普普通通，點知道連味道都真係普普通通，食落無泡菜味，配菜都極少，麵質都偏腍，燥燥哋想叫老闆娘俾番9蚊雞我！

阿燥評分：1個辣度、2個好味

2.Paldo泡菜味大碗麵

呢個杯麵相當有驚喜，泡菜味好濃，微微有少少酸味，而且個碗咁大，食落個麵都好似好大（心理上），湯底亦夠味，整體味道好好。

阿燥評分：3個辣度、4個好味

3.出前一丁微辣泡菜鍋味

呢2日上架嘅新口味出前一丁微辣泡菜鍋味，湯底食得出有「出前一丁」嘅味道，而且配菜多咗泡菜，多咗些少辣味。食之前先好碗麵嘅辣油包，本身微微嘅辣味即刻倍增，重有泡菜香味，真心堅好食！ 阿燥都話正！

阿燥評分：4個辣度、5個好味

內容延讀：

>唔辣！紋身都可以好健康 有機紋身 新興、最潮又唔痛

>食辣邊隊啤！杜如風力推手工啤 你都唔知嘅10件醉爆事