全裸誘惑 鄭雨盛

鄭雨盛喺改編韓國傳統戲劇《沈清傳》嘅新戲《情慾誘惑》中，飾演已婚教授嘅佢遇上鄉村少女（李絮），奪去對方初夜後始亂終棄都算，重要見死不救，8年後，教授變成盲佬，少女變為毒女，報仇再報仇……《情》嘅性愛場面雖然冇《格雷的五十道色戒》咁玩SM，但都應該可以滿足觀眾嘅獵奇心態。再睇埋呢個訪問，深信你會更想入場吧！

text-Phoebe

唔怕床戲太多
鄭雨盛從影作品當中，不乏做深情男、英雄同壞人等角色，今次喺《情》中，雖然只係飾演文學教授，但既要偷食後女＿，又要迫對方落仔，床戲接床戲，到底係咩原因令佢接拍呢？ 鄭雨盛話最主要係因為導演林弼成，佢話：「用咗1個月時間去考慮，與其話係我下決心去接，倒不如話係導演打動我，因為喺打造沈鶴圭呢個角色過程當中，導演比我更擔心會影響到鄭雨盛嘅形象， 佢比我更小心同深思熟慮，亦因而對佢非常之信賴。我接拍前冇問准父母，但有問過女主角李絮，佢話有將劇本俾媽媽同家姐睇，亦得到對方支持。床戲係直接表現沈鶴圭因慾望嘅墮落而作出嘅行為，所以必須做得大膽。《情》係我嘅選擇，完全唔擔心因為床戲而被定為三級男星。」

用心做賤男

戲中後半段鄭雨盛視力開始衰退，因而令李絮有機會埋身進行復仇大計，要做盲佬，鄭雨盛表示其實唔難，但亦唔簡單，因為對演員嚟講，任何困難嘅演技都係新挑戰。問佢覺唔覺得沈鶴圭係個世界級賤男，佢就話：「拍攝時，雖然無法完全認同沈鶴圭嘅感情同想法，但為咗忠於原著，同埋超越自己固有嘅觀念，雖然有啲辛苦，但都投放咗好多心思同努力。 「喺韓國都有唔少人問到底沈鶴圭係咪真係愛過德兒（李絮飾），由女方好純真到後來嘅熱烈誘惑，沈鶴圭其實可以抗拒，但佢冇咁做，直到後來感受到問題嚴重性，想抽身已經太遲，繼而產生出罪疚感。至於兩個人係咪將罪疚感同愛混埋一齊，可能要觀眾自己去感受。電影上映之後，除咗床戲同露股之外，觀眾對我嘅演技都俾咗好高嘅評價，對我嚟講，係1部好大成就嘅作品。」

身材唔可以太好

戲中被鄭雨盛呃嘅純真少女，由模特兒出身嘅李絮飾演，出道7年，作品唔多，但合作過對手都係好嘢，如車勝元、蘇志燮等演技級人馬，今次喺《情》中，再集多位男神，問到鄭雨盛點睇呢位對手，佢就話：「拍攝嗰陣實在唔可以有個人感情，現場只有德兒同鶴圭，不過相信對拍攝經驗唔多嘅李絮嚟講係好困難同辛苦。但佢將自己嘅情緒控制得好好，進步亦都令我好驚訝，絕對係個有潛質嘅演員。
「拍攝床戲之前，我哋會同導演討論點樣嘅身體接觸先係最適合德兒同鶴圭，雖然係有好多床戲，但我冇特別去健身，因為拍《情》之前嘅《神之一手》係動作片，運動量已經好充足。再加上韓國人對於教授呢個職業存有偏見，如果身材太好，反而會對角色造成反感。」

上映日期：3月12日